Para takimit ndërmjet kryeministrit të Kosovës Albin Kurti dhe Presidentit të Serbisë Aleksandar Vuçiq në Bruksel, në një pronocnim për media ka folur kryediplomati evropian, Josep Borrell, shkruan InLajmi.
Borrell do takohet me Kurtin dhe Vuqiç i shoqëruar edhe nga i dërguari Special i BE-së për dialogun, Mirosllav Lajçak, në fjalën e tij Borrell u shpreh se vazhdimi i dialogut mes 2 vendeve është rruga e vetme drejtë BE-së.
“Sot bashkë me Përfaqësuesin e Posaçëm të BE-së për dialogun Kosovë-Serbi, Miroslav Lajçak, do të jemi nikoqirë të një takimi të ri të nivelit të lartë të dialogut mes Beogradit dhe Prishtinës. Jam i lumtur që ky takim po ndodh në kohën e njëjtë kur Bashkimi Evropian do të takohet me presidentin amerikan, Joe Biden, këtu në Bruksel. Është kënaqësi të takoj dhe të mirëpres në Bruksel presidentin e Serbisë, Aleksandar Vuçiq, dhe kryeministrin e Kosovës, Albin Kurti, jo shumë kohë pas vizitës bilaterale në Bruksel”.
“Unë atëherë i kam inkurajuar të dy që të vazhdojnë me takimet në kuadër të dialogut, pa vonesa, dhe me fokusin për të prodhuar rezultate pavarësisht të gjitha pengesave ekzistuese. Ne e dimë se ky dialog nuk do të jetë i lehtë, por ky proces dhe përkushtimi i sinqertë nga të dyja palët është i nevojshëm për të mirën e popullit të Kosovës dhe Serbisë. Le të jemi të qartë – dialogu dhe rezultati i tij është rruga drejt të ardhmes evropiane për të dyja vendet”.
“Në të njëjtën kohë ky dialog tashmë ka sjellë rezultate të rëndësishme për qytetarët e të dyja vendeve p.sh integrimi i policisë dhe gjyqësorit në veri të Kosovës në sistemin e Kosovës, ose pjesëmarrja si anëtarë të plotë në organizata dhe iniciativa të ndryshme. Bashkimi Evropian dhe unë personalisht jemi të interesuar të shohim progres të shpejtë që më në fund ta lëmë të kaluarën prapa, të arrijmë marrëveshjen përfundimtare gjithëpërfshirëse për normalizimin e marrëdhënieve mes Kosovës dhe Serbisë dhe ta bëjmë të ardhmen evropiane një realitet”.
Kryediplomati evropian tha se ky është një momentum i ri për gjithë Ballkanin dhe duhet të shfrytëzohet në veçanti nga Kosova dhe Serbia sepse marrëdhëniet mes tyre janë pikë kyçe për stabilitet në rajon.
“Është momentum i ri në Evropë për Ballkanin Perëndimor dhe mendoj se është e rëndësishme për tërë rajonin që ta shohin këtë mundësi. Kjo mundësi është për gjithë rajonin, jo veç për Kosovën dhe Serbinë, sepse marrëdhëniet mes tyre janë shumë të rëndësishme për stabilitetin e gjithë rajonit”./InLajmi/
