Pas shkarkimit të Valdete Dakës nga kryetarja e Komisionit Qëndror të Zgjedhjeve ka reaguar ashpër Aleanca për Ardhmërinë e Kosovës, ku ata e konsideruan shkarkimin e saj një praktikë të paparë institucionale deri më tani dhe dëshmuan për të satën herë kapjen e shtetit nga partia në pushtet, përcjell InLajmi.
Faqja zyrtare e Aleancës për Ardhmërinë e Kosovës ka shkruar se arsyetimet e dhëna për shkarkimin e Dakës janë të pasakta, sepse para shkarkimit i është kërkuar dorëheqja në këmbim të mirënjohjes.
AAK-ja i’u bëri thirrje Qeverisë së Republikës së Kosovës që të ndalojë përpjekjet për kapjen e shtetit dhe arrogancën e numrave.
Postimi i plotë i tyre:
Aleanca për Ardhmërinë e Kosovës konsideron se shkarkimi i Kryetares së Komisionit Qendror Zgjedhor (KQZ), Valdete Daka, nga Presidentja Osmani, është praktikë e paparë institucionale dhe dëshmon për të satën herë kapjen e shtetit.
Sulmi në institucionet e menaxhimit të zgjedhjeve, është tregues i tentimit për vendosjen e autokracisë, fenomen për të cilin Aleanca ka tërhequr vërejtjen shumë kohë më parë.
Arsyetimet e dhëna për shkarkimin e Dakës janë të pasakta, sepse para shkarkimit i është kërkuar dorëheqja në këmbim të mirënjohjes. Ky është tregues i qartë i mënyrës së qeverisjes qe po tentohet të instalohet në vendin tonë.
I bëjmë thirrje qeverisë së Republikës së Kosovës që të ndalojë përpjekjet për kapjen e shtetit dhe arrogancën e numrave.
Kosova është Republikë Parlamentare me demokraci të konsoliduar dhe si e tillë funksionon dhe është pranuar nga shumë shtete. Këto praktika jodemokratike duhet të marrin fund. /InLajmi/
