Në senacën që po mbahet në Gjykatën Speciale, ndaj ish-luftëtarit të UÇK-së Salih Mustafa, është diskutuar dhe janë propozuar datat për fillimin e gjykimit, raporton InLajmi.
Nga Zyra e Prokurorisë është kërkuar që gjykimi për rastin e Mustafës të fillojë më 12 Korrik, gjë që është kundërshtuar nga avokati Von Bone, i cili është arsyetuar se i duhet më shumë kohë për përgatitje dhe si kohë më e përshtatshme për nisjen e gjykimit do të jetë ndonjë datë pas 13 Gushtit.
“Ne do të bëjmë një deklaratë hapëse që besoj që do të jetë goxha e gjatë në fillim të gjykimit. Unë e ndjek prokurorinë që thanë se duan që të kenë deklaratën e hapjes, dhe më pastaj të vazhdojnë me dëshmitarët. Megjithatë s’jemi në dakord me afatin kohor sepse kemi planifikuar disa misione. Për këtë arsye, nuk duam që të fillojmë me gjykimin në afatin e propozuar nga Prokuroria, por pas pushimit. Pra do të ishte më mirë sepse mbrojtja dhe zyra e viktimave do të duhej të përgatiten. Mendoj që pas pushimit të gjykatës, të gjitha këto gjëra do të jenë në fund më të mirë, përfshirë logjistikën dhe familjarizimin sa i përket dëshmitarëve. Në të kundërtën do të ishte e pamundur të fillojmë më 12 Korrik. Nuk besoj që data 12 Korrik është datë realiste. Do të ishte mirë, që gjykimi të fillojë pas pushimit të verës”, është shprehur Von Bone.
Edhe Zyra e Përfaqësimit të Viktimave doli kundër propozimit të prokurorisë duke thënë se duhet të dëgjojë më shumë deklarata, prandaj fillimin e gjykimit e mendon se është më mirë të bëhet pas pushimit të verës.
“Pas pushimeve verore, pasi që mirë është që të fillohet me një përgatitje sa më të gjithanshme. Është një makineri e tërë në sfond që duhet të vihet në punë. Unë duhet të jem në gjendje që të përfaqësoj viktimat, dhe ka njerëz me të cilët duhet të flas. Sigurisht që kjo varet nga koha se kur do fillojmë. Në qoftë se Trupi Gjykues vendos që të fillojmë në korrik, unë ato do t’i jap në gusht. Unë me kënaqësi do ta bëja deklaratën time në fillim të gjykimit, pas prokurorisë”, është shprehur përfaqësuesja e Zyrës së Viktimave. /InLajmi/
