Kushtrim Gara nga Komisioni qeveritar për të pagjeturit ka thënë se nga procesi i gërmimeve në varrezën masive në Kizhevak të Rashkës mendohet se janë nxjerrë të paktën mbetjet mortore të 9-të personave.
“Janë nxjerrë së paku mbetjet mortore të së paku 9-të personave dhe një rast ribashkimi, pra gjithsejtë dhjetë persona. Nga procesi i zhvarrimeve i filluar në muajin nëntor janë identifikuar mbetjet e 2 personave”, tha Gara
Gara thotë se së pari do të bëhet analiza e ADN-së e më pas edhe identifikimi i mëtejmë i këtyre personave.
Ai thotë më tej se varreza masive në Kizhevak të Rashkës ka lidhje me varrezën masive në Rudnicë të Rashkës
Siç dihet nga varreza masive në Rudnicë të Rashkës janë gjetur mbetjet e 54 viktimave përfshirë edhe 29 viktima nga Masakra e Rrezallës. Aktualisht janë edhe shtatë persona nga Masakra e Rrezallës, vendndodhja e të cilëve nuk dihet, si dhe tri viktima tjera nga Rrezalla por që janë të zhdukura në data të ndryshme”.
Gara thotë se me të identifikuar këto viktima do të njoftohen familjarët për të caktuar datën e rivarrimit.
Zyrtari nga Komisioni qeveritar për të pagjeturit ka thënë se do të priten analizat ADN-së për të vendosur se si do të vazhdohet me gërmime në Rudnicë.
Ai ka thënë se janë edhe disa lokacione të dyshuara në Serbi për varreza masive siç është Liqeni i Rudnicës apo disa lokacione në Novi Pazar.
Gara thotë se se edhe në Kosovë do të vazhdojnë gërmimet për varreza masive, në RTV Dukagjini.
“Varrezat në Mitrovicë, Shtime, Gjakovë dhe lagjen Arbana të Prizrenit janë lokacione të gërmimeve për varreza të mundshme”, deklaroi ndër të tjera Kushtrim Gara.
