Asamblisti i PDK-së në Asamblenë komunale të Mitrovicës, Dr. Donjet Bislimi, ka theksuar se propozimet e miratuara në asamble, janë me vlerë për qytetarët, përcjell InLajmi.
Propozimet e PDK-së janë deklarata e përbashkët kundër përdhunimeve dhe luftimin e këtyre dukurive negative.
Po ashtu, janë miratuar rekomandime të ndryshme si dhe u adresua shqetësimi rreth qirave për familjet në nevojë.
Postimi i plotë i Donjet Bislimit në rrjetin social:
Me propozimin tonë sot në Kuvendin Komunal të Mitrovicës adresuam shqetësimin e madh të fenomenit të dhunës ndaj grave dhe aprovuam një deklaratë të përbashkët ku dënohen përdhunimet e fundit dhe kërkohet nga organet gjegjëse të intensifikojnë punën e tyre në luftën kundër këtyre dukurive.
Gjithashtu u votua edhe rekomandimi ynë për DKRS-në që të trajtohet muzeu në fshatin Vllahi, dhe mbështetja financiare për Organizatën e Veteranëve të Luftës së UÇK-së, Shoqatën e Invalidëve të Luftës, Shoqatën e Familjeve të Dëshmorëve si dhe organizatat “Handi-Kos” dhe “Zëri i Prindërve”.
Po ashtu shpreha shqetësimet drejtuar Drejtorisë së Shëndetësisë për gjendjen jo të mirë në Mitrovicë dhe Drejtorisë së Mirëqenies Sociale për mos zbatimin e vendimit të pagesës së qirave mujore për familjet në nevojë. /InLajmi/
