Rektorati i Universitetit të Prishtinës “Hasan Prishtina” është sqaruar për rastin e pagesës së dyfishtë për asfaltimin e rrugës deri tek objekti i ri i Fakultetit të Bujqësisë dhe Veterinarisë, pak ditë pasi ministri i Financave, Hekuran Murati, në një konferencë për media njoftoi se “janë identifikuar transfere të dyshimta gjatë barazimit”.
Sipas përgjigjes, por edhe deklarimit të ministrit Murati, pagesa ishte bërë edhe në linjë të rregullt, por edhe përmes përmbaruesit privat.
“Është bërë pagesë e dyfishtë. Është kryer sepse fatura ka ardhur të paguhet përmes përmbaruesit privat, por të njëjtën këto organizata buxhetore e kanë bërë edhe pagesën përmes faturës së rregullt. Janë marrë të gjitha masat e nevojshme. Presim shumë shpejt të rezultojë kthimi i pagesës. Ka filluar kthimi e besoj shumë shpejt do të kemi të qartësuar këtë gjë”, kishte thënë Murati të enjten duke mos dhënë detaje se për cilat institucione bëhet fjalë.
Ai pati paralajmëruar se Qeveria s’do të mjaftohet me kthimin e mjeteve.
“Keqbërësit s’kanë vend në institucionet publike. Abuzimet e tilla duhet ta dijë secili që nuk do të tolerohen nga kjo qeveri”, qe shprehur Murati.
Ndërkaq, nga UP-ja është bërë e ditur se pagesa në fjalë ishte identifikuar pas dërgimit të konkluzionit për ekzekutim të pagesës nga ana e përmbaruesit, e cila ishte dërguar më 7 maj.
“Me datë 7 maj 2021 pas njoftimit (konkluzionit për ekzekutim të pagesës) sekretari i UP-së ka kërkuar informacion nga zyrtarët nëse është kryer pagesa nga UP-ja para tërheqjes së mjeteve nga Thesari. UP-ja pagesën e ka realizuar me datë 26 prill 2021, ndërsa thesari tërheqjen e mjeteve sipas urdhrit përmbarimor e ka realizuar me datë 28 prill 2021. Me datë 12 maj 2021 Universiteti i Prishtinës ka kërkuar nga kreditori-OE-Izolimi kthimin e mjeteve në Buxhet të Kosovës. Me datë 14 maj 2021, Thesari përmes shkresës zyrtare ka kërkuar nga OE-Izolimi kthimin e mjeteve me afat deri më datë 18 maj 2021”, thuhet në njoftimin e UP-së, raporton ‘Koha’.
Aty po ashtu thuhet se kompania që ka marrë 100 mijë euro shtesë, pos pagesës për projektin, ka kërkuar mirëkuptim që mjetet t’i kthejë deri më 21 maj, por deri tash s’është realizuar kthimi i plotë, transmeton Insajderi.
“Kompania ka kërkuar mirëkuptim që mjetet t’i kthej deri më datë 21 maj 2021, mirëpo për shkak të bllokimit të llogarive bankare, deri më tani nuk ka mundur ta realizoj kthimin e të gjitha mjeteve, mirëpo kthimi është në proces e sipër. OE me datë 18 maj 2021 ka kthyer 16% të mjeteve, ndërsa dje gjatë ditës (orarit zyrtar të punës) ka kthyer edhe një shumë prej 39%, pra gjithsej 55% të shumës”, thuhet në përgjigjen e Rektoratit të UP-së të shtunën, duke shtuar se për rastin janë lajmëruar autoritetet e hetuesisë.
