Publicisti Veton Surroi ka thënë se gjuha e përdorur nga Ministria e Jashtme ndaj zhvillimeve të ndryshme duhet të jetë e zgjedhur.
Surroi vlerëson se në rastet si ai i fundit për statusin në Twitter ku përmendet Rusia dhe ai i ditëve më parë për konfliktin në Gaza nuk është përdorur gjuha adekuate.
“Është dashur të zgjidhen fjalët, është dashur të mos hyhet aty ku nuk e kemi vendin. Nuk e kemi vendin të merremi me formulime të tilla. Duhet stabilizuar narracionin e këtij vendi. Jemi vend që kërkon paqe, mbrojtje. Këto ndodhin në pajtim me popujt tjerë. Jemi të rrezikuar nga forcat jodemokratike. Ne kemi aspirata perëndimore. Ndjeshmëria jonë për të drejtat e njeriut duhet të jetë më e lartë se e çdo populli tjetër. Nuk kemi fuqi ushtarake që të flasim se qëndrojmë kështu apo ashtu”, është shprehur Surroi.
Ndërkaq sa i përket konfliktit në Izrael-Palestinë, Surroi ka shtuar se Kosova nuk mund të mbajë anë.
Izraeli është forcë okupatore e cila e ka arritur pragun e aparteidit dhe krimeve serioze kundër njerëzimit. Është luftë që vret civilë dhe fëmijë dhe nuk mund të jemi indiferentë ndaj kësaj çështjeje. Populli palestinez ka të drejtë të jetojë në paqe dhe në shtetin e vet”.
“Nuk mund të jemi në parime që diçka të vlejë për ne e të mos vlejë për popujt e tjerë. Fjalët kanë domethënie të madhe dhe duhet të jemi të kujdesshëm se si ti zgjedhim. Narracioni ynë nuk duhet të jetë i pamatur. Më mirë të mos flitet shumë ose të flitet “pwrfundi radarit” sesa të tejkalohet norma”.
