Partia Socialdemokrate do të qëndrojë të martën në komunën e Prizrenit, për të mbledhur nënshkrime për peticionin e faljes së gjobave të shqiptuara ndaj qytetarëve dhe bzoneseve për shkeljen e masave anti-Covid, raporton InLajmi.
Këtë e ka bërë të ditur zëdhënësja e PSD-së, Natyra Kuçi e cila ka treguar se ka pasur interesim të madh të qytetarëve për të nënshkruar peticionet.
“Jemi që 3 ditë këtu për mbledhjen e nënshkrimeve, ka shkuar mirë dhe ka pasur interesim të madh dhe me këtë interesim që po shohim, po duket që nënshkrimet kanë me u mbledh shumë shpejtë, ku edhe në komuna tjera kemi me vazhdu dhe në përgjithësi po shkon mirë”, tha Kuçi.
Ndër të tjera, anëtari i PSD-së, Frashër Krasniqi, ka thënë se janë arritur mijëra nënshkrime.
“Tash jemi në ditën e tretë dhe gatishmëria është e madhe për të nënshkruar, duke pasur parasysh se pandemia ka prekur ata që kanë më së paku. Ligji është zbatuar në mënyrë selektive ku qytetarët janë dënuar në mënyrë masive. Deri tash janë mbledhur mijëra nënshkrime sepse është duke vazhduar akoma, nesër do jemi në qytetin e Prizrenit deri të arrijmë në numrin e kërkuar”, tha Krasniqi. /InLajmi/
