Ish-ministrja e Financave Hykemete Bajrami ka pasur një përplasje gjatë seancës në Kuvendin e Kosovës ndaj ministres së Drejtësisë Albulena Haxhiu, raporton InLajmi.
Hykemete Bajrami ka kërkuar nga Albulena Haxhiu si ministre e Drejtësisë që të autorizojë organet e drejtësisë për zbardhjen e rastit të 2.1 milionë eurove.
“Unë Hykmete Bajrami po u them të gjithë deputetëve të Lëvizjes Vetëvendosje, se jetojë në Prishtinë. Vi çdo herë në Kuvend, sa herë ka seancë apo Komisione Parlamentare. Nuk fshihem askund. Ministrja e Drejtësisë e cila dje tha që e kam autorizuar prokurorinë që të merret me rastin e drogës, është mirë që me e autorizu çdo organ të drejtësisë që të merret edhe me rastin e 2.1 milionëshit dhe me rastin e Hykmete Bajramit sepse duhet me u pastru njëherë e përgjithmonë kjo çështje”, ka thënë ajo.
Nga ana tjetër ministrja e Drejtësisë iu është kundërpërgjigjur mjaftë ashpër duke i thënë se ministrja e Drejtësisë nuk e ka të drejtën që ta autorizojë prokurorinë që të nis hetime.
“Më vjen keq që nuk jeni në dijeni për përgjegjësitë që i ka ministri në raport me rastet që hetohen nga prokuroria. Nëse nuk e dinë më lejo të njoftojë që ministri i Drejtësisë nuk ka të drejtë që ta autorizojë prokurorinë që të nis hetime. Ministri i Drejtësisë i autorizon autoritetet e huaja që të vijnë në Kosovë. Guardia de Finanza ka qenë në Kosovë me autorizimin tim. Uroj që kjo të jetë hera e fundit që keqinformon dhe shpif në foltoren e Kuvendit të Kosovës,” ka thënë Haxhiu./InLajmi/
