Njohësi i çështjeve politike, Dukagjin Gorani, po vlerëson se Bashkimi Europian është e interesuar që t’i bëjë ndërmjetësues edhe liderët rajonalë në zgjidhjen e çështjes mes Kosovës e Serbisë.
Sipas tij, këtë e tregon edhe mënyra e organizimit të darkës së fundit të mbajtur në Bruksel, ku pjesë e këtij takimi ishte edhe kryeministri i Kosovës, Albin Kurti.
”Në takime të tilla ku mblidhen liderët e Ballkanit, dhe ku nuk ka ndonjë deklaratë të përbashkët, atëherë ata janë mbledhë për ta pleqnuar një dert”.
”E derti më i madh është çështja mes Serbisë dhe Kosovës. Natyrisht që ky është vetëm spekulim i imi. Por, mbrëmë është folur kryekëput vetëm për çështjen e pazgjidhur mes Kosovës dhe Serbisë”.
”Kjo nënkupton që Bashkimi Europian është i interesuar që hisedar, në ndërmjetësim në këtë çështje me qenë edhe liderët e rajonit, ku Kosova nuk ndahet keq marrë parasysh që e ka përkrahjen e garantuar së paku të Shqipërisë dhe ekziston megjithatë edhe një vullnet i mirë edhe nga ana e fqinjve të tjerë siç është edhe Maqedonia e Veriut dhe Mali i Zi”.
Gorani në Rubikon me Adriatik Kelmendin gjithashtu komentoi edhe qasjen e kryeminsitrit kosovar, karshi negociatave me palën serbe.
Ai thotë se ndryshe nga ato në Kuvend, me deklarimet e tij të mbrëmshme, kryeministri Albin Kurti përdori retorikë tjetër, njofton Klan Kosova.
”Kthyer tek deklarimet e kryeministrit – tashmë është shndërruar në trend ndryshimi i të folurit varësisht nga audienca. Ajo mund t’i ketë të mirat e veta, por mund t’i ketë edhe të këqijat”.
”Deklarimi i tij i fundit para atij të mbrëmshmit ka qenë në Kuvend. Edhe retorika e përdorur në Kuvend ka qenë shumë më e ashpër dhe shumë më me vetbesim më të madh. Mirëpo në Kuvend po ashtu janë ngritur disa çështje tek të cilat nëse i analizon kontekstin e dialogut, ato çështje më shumë shërbejnë si përpjekje për me frenu sesa për t’i hapur rrugë dialogut”.
”Për shembull padia ndaj Serbisë për gjenocid – edhe ajo qasja e vazhdueshme rreth rishqyrtimit të marrëveshjeve të mëhershme që konsiderohen së paku nga kjo qeveri si të dëmshme”.
”Përvoja më thotë që kur përmend këto dy sende, edhe për ndërmjetësuesit e dialogut edhe për palën tjetër në dialog, kjo e nënkupton që s’e ke ndërmend as me shku, s’e ke ndërmend as me negociu. Përmendja apo së paku prezantimi i këtyre kërkesave që më vonë mund të shndërrohen në kushte, shpesh herë tregohen të jenë sikurse në rastin e taksës, ose edhe në atë të reciprocitetit tregohen të jenë pengesa të pakalueshme edhe e bllokojnë dialogun”.
”Edhe atë ditë kur e dëgjova në Kuvend me veten thash: ”Këtu s’ka kurgjo. Ky [Albin Kurti] s’e ka ndërmend me shku”.
”Ashtu e pashë në Kuvend, kurse mbrëmë në deklarimin e mbrëmshëm është retorikë krejt tjetërfare. Është retorikë më e barazpeshuar por është tepër shumë e përgjithësuar”.
