Në Ditën Ndërkombëtare të Infermierisë, kryetari i Odës së Infermierëve, mamive dhe Profesionistëve tjerë shëndetësorë, Naser Rrustemaj ka falenderuar të gjithë mantel bardhët për përkushtimin e tyre në përballje me koronavirusi, ku sipas tij pandemi ka marrë nga jeta 11 kolegë të tyre, përcjell InLajmi.
Ndër të tjera Rrustemaj ka thënë se jo vetëm ballafaqimin me koronavirusin, por infermierët po ballafaqohen edhe me sfida të tjera.
“Kjo, pasi çdo ditë pune e infermierëve, është një ecje nëpër “tehun e thikës” që metaforikisht nënkupton ekspozimin ndaj rrezikut jo vetëm në raport me virusin Covid 19, por edhe shumë rreziqe tjera që ndërlidhen me sigurinë në punë”, ka thënë ai.
Postimi i plotë i tyre:
Të dashur infermierë
Edhe këtë vit, Dita Ndërkombëtare e Infermierisë, që shënon edhe ditën e lindjes së Florence Nightingale, themelueses së infermierisë moderne, na ka gjetur në luftë me njërën nga betejat më të vështira për komunitetin mjekësor, infermierinë por edhe botën në përgjithësi – pandeminë Covid 19.
Oda e Infermierëve, Mamive dhe Profesionistëve tjerë shëndetësorë, duke iu falëmnderuar për përkushtimin e madh dhe profesionalizimin që keni treguar në betejën që deri më tani ka marrë jetën e 11 kolegëve tanë në Kosovë, iu siguron gatishmërinë e përhershme për të qenë në krah tuajin, jo vetëm simbolikisht në ditët si kjo që i dedikohet komunitetit tonë.
Infermierët, në Kosovë dhe jo vetëm, luajtën rolin kryesor në trajtimin e rasteve me Covid-19 dhe ky rol, siç e dini, u njoh nga Organizata Botërore e Shëndetësisë, përmes një dokumenti që thekson sfidat dhe rëndësinë e infermierisë në të gjithë botën.
Jemi të vetëdijshëm se Ju, përveç ballafaqimit me pandeminë, po përballeni edhe me sfidat serioze për të pasur kushte më të mira të punës dhe për të krijuar një siguri e mirëqenie për Ju dhe fëmijët Tuaj.
Kjo, pasi çdo ditë pune e infermierëve, është një ecje nëpër “tehun e thikës” që metaforikisht nënkupton ekspozimin ndaj rrezikut jo vetëm në raport me virusin Covid 19, por edhe shumë rreziqe tjera që ndërlidhen me sigurinë në punë.
Pashmangshëm, këtu nuk mund të anashkalohet edhe gjendja jo e mirë financiare e infermierëve në Kosovë dhe detyrimi i tyre për të punuar edhe punë tjera për mbijetesë.
Andaj, të dashur infermierë. Duke shpresuar fillimisht që bota do të dalë nga kjo betejë e vështirë që e ka kapluar dhe pas saj, të njihemi edhe më të fortë se ç’ishim. Ditët e vështira nxjerrin njerëz të kalitur mirë andaj, roli dhe forca Juaj e dëshmuar, do të njihet domosdo.
Urime Dita Ndërkombetare e Infermierisë!
Naser Rrustemaj
Kryetar i Odës së Infermierëve, Mamive dhe Profesionistëve tjerë shëndetësorë /InLajmi/
