Pritjet e kryeministrit Albin Kurti se administrata e presidentit Joe Biden do ta hidhte në kosh të plehrave Marrëveshjen e Washingtonit kanë marrë një goditje të fuqishme. Tashmë administrata amerikane e kërkon edhe zyrtarisht implementimin e zotimeve të bëra para Donald Trumpit në Shtëpinë e Bardhë nga Kosova dhe Serbia.
Përplasjet me Richard Grenellin, si një prej njerëzve më të besuar të Donald Trumpit sa ishte president i SHBA’së, dhe shpresa se me ardhjen e Joe Bidenit në pushtet do të hidhej në bërllok gjithçka që ishte nënshkruar në Shtëpinë e Bardhë nga Avdullah Hoti, kishin bërë që Albin Kurti të pozicionohej skajshmërisht kundër një produkti amerikan si Marrëveshja e Washingtonit.
4 ditë pas 4 shtatorit të 2020-ës, Albin Kurti, i rrëzuar nga pushteti pas përplasjeve të mëdha me administratën amerikane që drejtohej nga Trumpi, kishte shkruar se në Kuvendin e Republikës së Kosovës nuk do të ratifikohet asgjë që është nënshkruar nga një “kryeministër jolegjitim” si Avdullah Hoti.
“Kur të kthehemi në detyrë, nuk kemi obligime ndaj zotimeve të një kryeministri të paligjshëm të Kosovës. Nënshkrimi poshtë teksteve jokoherente dhe jotransparente është kundër vullnetit të popullit, rendit demokratik dhe shkel kushtetutën. Ato nuk do të ratifikohen në Parlamentin tonë”, kishte shkruar Albin Kurti.
Ky pozicionim i Kurtit dhe i Vetëvendosjes kundër Marrëveshjes së Washingtonit ishte forcuar edhe më tej pas fitores së demokratëve në zgjedhjet amerikane, meqë kishin pritje se ajo që ishte arritur në Shtëpinë e Bardhë do të shkonte dëm si pasojë e dallimeve politike mes Joe Biden-it, të cilin Kurti e kishte përkrahur hapur në zgjedhje, dhe Donald Trump-it.
Një goditje të lehtë kësaj qasjeje të Kurtit dhe Lëvizjes Vetëvendosje ndaj Marrëveshjes së Washingtonit ia kishte dhënë Antony Blinken gjatë raportimit në Senatin Amerikan, kur pritej konfirmimi i këtij të fundit si sekretar i Shtetit, pak ditë pas fitores që Joe Biden kishte korrur në zgjedhje.
“Sa për punën që është bërë në rastin e Kosovës dhe Serbisë, unë e duartrokas këtë. Siç e dini, presidenti i zgjedhur, Joe Biden, ka shpenzuar shumë kohë në këto vende në të kaluarën. Unë besoj se ai ndan bindjet e juaja se ka gjëra që ne mund t’i bëjmë që ta ndihmojmë Kosovën të ecë përpara, po ashtu shpresojmë që kjo të ndodhë edhe me Serbinë”, kishte thënë Blinken.
Megjithatë, për fanatikët e Kurtit dhe Lëvizjes Vetëvendosje, një deklaratë e tillë e Blinken-it nuk duhej të kuptohej si përkrahje për Marrëveshjen e Washingtonit dhe, sipas tyre, zotimet e bëra në “White House” nuk do të shtyheshin përpara nga Joe Biden-i.
Por tashmë gjithë këto pritje të Albin Kurtit e Vetëvendosjes janë përmbysur me qëndrimin e betonuar zyrtar të administratës së presidentit Joe Biden se Marrëveshja e Washingtonit duhet të implementohet.
“Administrata e Biden-it ka konstatuar edhe zyrtarisht që Marrëveshjet e Washingtonit duhet të jenë bazë për punën tonë përpara. Ne besojmë se Kosova dhe Serbia duhet t’u përmbahen këtyre zotimeve dhe të punojnë së bashku”, ka thënë Ambasadori i Shteteve të Bashkuara të Amerikës në Prishtinë, Philip Kosnett, në një intervistë për Radio Televizionin 21.
Qëndrim të njëjtë për Marrëveshjen e Washingtonit Philip Kosnett pati edhe tri javë më herët, në një intervistë të dhënë për emisionin “Rubikon”.
“Disa njerëz menduan se Administrata e Biden-it thjesht do të griste çdo gjë që kishte bërë Administrata Trump. Kjo nuk ka ndodhur. Në fakt, Administrata e Biden-it ka bërë të qartë se mendojmë se një pjesë e madhe e punës së bërë në forcimin e marrëdhënieve tregtare ndërmjet Kosovës dhe Serbisë dhe në rajon ishte pozitive dhe do të vazhdojmë të punojmë mbi to”, kishte deklaruar Kosnett.
Lideri i Lëvizjes Vetëvendosje, i cili është rikthyer në pushtet pas zgjedhjeve të 14 shkurtit, në vazhdimësi i kishte shprehur rezervat e tij për Marrëveshjen e Washingonit. Thoshte se nga një marrëveshje e tillë “s’ka fort gjëra të mira’ dhe shtonte se ajo marrëveshje duhej të shikohej nga poshtë, meqë, sipas tij, e vetmja pikë e vlefshme është vendosja e raporteve dhe njohja reciproke me Izraelin.
