Kryetari i Aleancës për Ardhmërinë e Kosovës, Ramush Haradinaj ka përkujtuar Betejen e Çabratit, përcjell InLajmi.
Ku sipas tij bijtë e bijat e Gjakovës ishin shembulli më i mirë i luftëtarëve të lirisë.
Haradinaj ka shkruar se kujtojmë me respekt 26 jetët e sakrifikuara për liri.
Postimi i plotë i tij:
Në Çabrat u mbrojt Gjakova! Në Çabrat u mbrojt Kosova! Nga Çabrati erdhi shpresa e fitores!
Beteja urbane e Brigadës 137 “Gjakova” është unike në historinë çlirimtare të Kosovës. Bijtë e bijat e Gjakovës ishin shembulli më i mirë i luftëtarëve të lirisë, që nga mobilizimi i tyre në ditët e para të luftës për liri, e deri tek formimi i Brigadës dhe dita e fitores.
Makina vrastare e Serbisë, në vazhdimësi të realizimit të politikës së gjenocidit kundër shqiptarëve, atë ditë nuk kurseu civilët e paarmatosur te Ura e Taliqit. Kujtojmë me respekt njëzet e gjashtë jetët e sakrifikuara për liri. Po të njëjtën ditë, trembëdhjetë shqiptarë u ekzekutuan edhe në Ozdrim të Pejës, fshat që u mobilizua që nga fillet e luftës për liri.
Përgjithmonë krenarë që kisha në krah bashkëluftëtarë si Heronjtë gjakovarë që i kujtojmë sot. Përgjithmonë krenarë me heroizmin dhe mirënjohës për sakrificën e popullit tonë për liri.
Lavdi! RH /InLajmi/
