Finalja e Kupës së Italisë midis Atalantas dhe Juventusit që zhvillohet më 19 maj do të ketë deri në 20 për qind të kapacitetit të shikuesve në stadium.
Ndeshja do të zhvillohet në Stadiumin Mapei në Reggio Emilia, që është shtëpia e klubit të Serie A, Sassuolo.
Lajmi u konfirmua nga nënsekretari i Shëndetësisë, Andrea Costa pas një kërkese nga FIGC për të parashikuar hapjen e ngjarjeve sportive më 1 qershor për këtë rast të veçantë.
“CTS po studion protokollin për të lejuar tifozët të futen në stadium dhe të marrin pjesë në ngjarje duke pasur siguri, duke respektuar plotësisht normat anti-COVID”, deklaroi ai.
CTS është Komiteti Shkencor Teknik, i cili refuzoi një kërkesë të mëparshme për të lejuar tifozët në stadiume nga 1 maji, transmeton Telegrafi.
Italia po ashtu po angazhohet për të paktën 25 për qind të kapacitetit për Stadio Olimpico në Romë, pasi nga 11 qershori zhvillohen katër ndeshjet të Euro 2020.
