U.d i kryetarit të Partisë Demokratike të Kosovës, Enver Hoxhaj ka komentuar deklaratën e kryeministrit Albin Kurti, ku ky i fundit ka thënë se nuk e ka neglizhuar dialogun Kosovë – Serbi dhe se do të takohen në gjysmë të muajit maj, përcjellë InLajmi.
Rreth kësaj deklarate u.d i kryetarit të PDK-së ka thënë se kjo rinisje e dialogut Kosovë – Serbi nga Albin Kurti e përmbysi të gjithë trashëgiminë e tij politike kundër negociatave Kosovë – Serbi.
Sipas Hoxhaj Kurti e ka rinisur dialogun në Bruksel pa vendosur reciprocitet me Serbinë dhe pa një platformë apo strategji.
Postimi i plotë i tij:
Me konfirmimin e tij për rinisje të dialogut me Serbinë, Albin Kurti sot e përmbysi gjithë trashëgiminë e tij politike kundër negociatave Kosovë-Serbi.
Kurti rinisi dialogun në Bruksel pa vendosur reciprocitet me Serbinë dhe pa një platformë apo strategji.
Nga Jo Negociata – Vetëvendosje, Kurti ra dakord në Bruksel që të hyjë në Negociata për Autonomi për serbët në Kosovë dhe të zhbëjë planin Ahtisaari që mundësoi pavarësinë e Republikës së Kosovës.
PDK si parti shtetformuese do të kundërshtojë çdo ide që synon zhbërjen e shtetit të Kosovës dhe përmbysjen e rendit kushtetues. Në Bruksel, duhet të ketë dialog vetëm për njohjen reciproke, asgjë tjetër. /InLajmi/
