Kryetari i Partisë Demokratike të Kosovës Enver Hoxhaj ka urar të premten ditën e Kushtetutës së Republikës së Kosovës, përcjellë InLajmi.
Hoxhaj tha se kjo Kushtetutë reflketon vlerat më të larta të shoqërisë, dhe se patriotizëm është respektimi dhe ruajtja e Kushtetutës.
Përmes një postimi, ai tha se PDK-ja ka qenë pjesë e procesit të themelimit dhe ruajtjes së kësaj Kushtetute.
Postimi i plotë i tij:
Sot, Republika e Kosovës shënon 13 vjetorin e miratimit të Kushtetutës, aktit më të lartë juridik të vendit tonë. Kjo Kushtetutë reflekton vlerat më të larta të shoqërisë sonë, si vlera bashkëkohore të bazuara në rend dhe ligj. Derisa më parë patriotizëm ishte lufta për të ardhur deri të themelimi i saj, sot, patriotizëm e atdhedashuri është respektimi dhe ruajtja e kësaj Kushtetute.
Fatkeqësisht, Kosova sot ka një shumicë parlamentare dhe një Qeveri e cila jo vetëm që nuk e ka njohur, por vazhdimisht e ka mohuar dhe luftuar misionin dhe funksionin e saj. Madje, ky grup njerëzish që aktualisht qeverisin me vendin kanë ardhur në pushtet duke ndjekur rrugë dhe metoda antikushtetutese dhe paraqesin një rrezik permanent për rendin tonë kushtetues. Partia Demokratike e Kosovës, siç ka ditur që të jetë pjesë e procesit të themelimit e më pas edhe ruajtjes së saj, do të dijë edhe sot që gjithmonë të jetë e gatshme për ta mbajtur të paprekshme atë. Urime, Kosovë! /InLajmi/
