Kryeministri, Albin Kurti, ka reaguar pak caste para se të fillojë seanca për zgjedhjen e presidentit të Kosovës, përcjellë InLajmi.
Kurti ka thënë se me dështimin e Ligjit për Zgjedhje mbrëmë ka fituar opozita kurse sot duhet të fitojë shteti. Ai shtoi se pasi të bëhet zgjedhja e presidentit do të formohen komisione për të proceduar së bashku me opozitën Ligjin për Zgjedhje
Postimi i plotë i tij:
Mbrëmë fitoi opozita, sonte duhet të fitojë shteti. Zgjedhja e Presidentes së Republikës është fitore për Kosovën. Ajo nuk është kundër askujt dhe është për të gjithë. Me zgjedhjen e Presidentes përmbyllet hapi i tretë i konstituimit të institucioneve të legjislaturës së tetë.
Pas fitores me 50,28% të votave në zgjedhjet e 14 shkurtit, ne jemi shumica në Kuvendin e Kosovës. Mbrëmë deputetët tanë ishin shumica, por nuk ishin 2/3 e të pranishmëve. Nuk arritëm të procedojmë me projektligjin që ua mundëson mërgatës të votojë në ambasadat e konsullatat tona.
Ky Projektligj nuk kishte të bënte me reformën zgjedhore. Sidoqoftë, ai sot nuk është aktual. Sot kemi seancën për zgjedhjen Presidente të Vjosa Osmani. Menjëherë pas kësaj formojmë komisionin ku bashkë me opozitën punojmë, pajtohemi dhe sivjet e përmbyllim reformën zgjedhore. /InLajmi/
