Policia ka arrestuar 3 persona në Fushë Kosovë për vjedhjen e ditarëve të shkollës “Hoxhë Kadri Prishtina”, përcjellë InLajmi.
Lajmin e ka konfirmuar zëdhënësi i Policisë për rajonin e Prishtinës, Agron Borovci për Gazetën InLajmi, ku tha se zyrtarët e shkollës kanë denoncuar rastin më 22 mars.
“Prishtinë, 30 mars 2021 Policia e rajonit të Prishtinës respektivisht hetuesit e stacionit policor të Fushë Kosovës kanë arrestuar sot tre persona lidhur me vjedhjen e ditarëve të shkollës “Hoxhë Kadri Prishtina” në Bresje të Fushë Kosovës. Rasti është denoncuar në polici më datë 22.03.2021 nga ana e zyrtarëve të shkollës ku sipas tyre ishin vjedhur dhjetë ditarë”, ka deklaruar Borovci.
Ai ka shtuar se menjherë pas denoncimit, Policia ka filluar me hetimin e rastit dhe kanë përfunduar me arrestimin e 3 personave.
“Policia menjëherë pas denoncimit kishte nisur një hetim për ndriçimin e rrethanave të ngjarjes dhe identifikimin e të dyshuarve.Progresi i hetimit të rastit ka rezultuar sot me identifikimin dhe arrestimin e tre të dyshuarve për të cilët dyshohet me bazë të jenë të implikuar në rastin në fjalë si dhe lokalizimin e vendndodhjes dhe gjetjen e ditarëve të vjedhur”, ka vazhduar ai. /InLajmi/
