Albulena Haxhiu ka pritur në takim të marten Guvernatorin e Bankës Qendrore, Fehmi Mehmetin me të cilin diskutuan rreth përfaqësimit të Kosovës në Arbitrazh, përcjellë InLajmi.
Në këtë takim u diskutua edhe për çështjen e rregullores e cila përcakton kritetret për vlerësimin e dëmeve jo materiale si dhe për rëndësinë e themelimit të Gjykatës Komerciale.
Haxhiu dhe Miftari u shprehën të gatshëm të bashkëpunojnë për të shtuar sukseset në këto institucione.
Njoftimi i plotë i Ministrisë së Drejtësisë:
Ministrja Haxhiu priti në takim Guvernatorin e Bankës Qendrore të Republikës së Kosovës
Sot ministrja e Drejtësisë Albulena Haxhiu së bashku me këshilltarin dhe shefin e kabinetit të Ministrisë Genc Nimoni pritën Guvernatorin e Bankës Qendrore, Fehmi Mehmetin si dhe shefin e kabinetit Nexhat Miftarin.
Përfaqësimi i Republikës së Kosovës në Arbitrazh ishte temë qendrore e këtij takimi, me ç’rast u diskutua rreth bashkëpunimit për përfaqësim sa më dinjitoz në këtë institucion.
Guvernatori Mehmeti, e vlerësoi të rëndësishëm koordinimin ndërinstitucional dhe njëherit ofroi bashkëpunimin për përfaqësimin sa më profesional në Arbitrazh.
Ministrja Albulena Haxhiu shprehi vullnetin dhe gatishmërinë e plotë për të ofruar bashkëpunim brenda kompetencave në synim të rezultatit sa më të mirë në këtë përfaqësim.
Guvernatori Mehmeti theksoi edhe rëndësinë e rregullores për përcaktimin e kritereve për vlerësimin e dëmeve jo-materiale si dhe vështirësitë e bashkëpunimit me institucionet kryesore të drejtësisë.
Në këtë takim është diskutuar edhe për rëndësinë e themelimit të Gjykatës Komerciale duke adresuar çështjen e përzgjedhjes së ekspertëve financiar dhe profesionalizmit të tyre.
Të 2 palët u dakorduan për thellim të bashkëpunimit për të mundësuar dhe rritur sukseset përballë aspiratave për të forcuar në këtë mënyrë institucionet respektive të Republikës së Kosovës. /InLajmi/
