Inspektorët sanitar të cilët veprojnë në kuadër të Agjencisë së Ushqimit dhe Veterinës, që nga fillimi i këtij viti e deri më tani kanë shqiptuar 764 gjoba për persona fizik dhe 715 gjoba për persona juridik. Sipas zëdhënësit të Agjencisë së Ushqimit dhe Veterinës Lamir Thaçi, këto gjoba janë shqiptuar në saje të mos respektimit të masave kundër koronavirusit.
Kurse, vetëm mbrëmë në Prishtinë, sipas tij, janë shqiptuar 19 gjoba ndaj lokaleve të gastronomisë të cilat po shkelin masat anti-Covid.
“Mbrëmë kemi shqiptuar 19 gjoba për lokale të gastronomisë në Prishtinë, ndërsa nga fillimi i vitit 2021 deri me datë tani nga inspektorati sanitar i AUV-së janë shqiptuar gjithsej 764 gjoba për persona fizik dhe 715 gjoba për persona juridik”, ka deklaruar ai, përcjellë EO.
Thaçi tutje ka thënë se Agjencia e Ushqimit ëshët duke ndërmarr të gjitha masat ndaj shkelësve të masave anti-Covid-19. “Agjencia e Ushqimit dhe Veterinarisë në kuadër të përgjegjësive ligjore institucionale përmes inspektoratit sanitar është duke vazhduar punën dhe duke ndërmarrë të gjitha veprimet e nevojshme me qëllim të zbatimit të masave anti Covid-19, ndaj të gjithë shkelësve”, ka thënë Thaçi
