Ministri i Kulturës, Rinisë dhe Sportit, Hajrullah Çeku ka ngushëlluar familjen e aktorit të njohur Luran Ahmeti, përcjellë InLajmi.
Në telegram thuhet se skenës teatrale dhe kinematografike do t’i mungojë profesionalizmi i Luranit.
Ahmeti me angazhimin e tij arriti të depërtoj edhe në kinematografinë ndërkombëtare duke përfaqësuar edhe artin shqiptar.
Telegrami i ngushëllimit nga Ministria e Kulturës:
E nderuar familja Ahmeti,
I tronditur dhe me pikëllim mora lajmin për ndarjen nga jeta e të dashurit tuaj, aktorit tonë të madh shqiptar, Luran Ahmeti.
Ikja e tij e hershme nga kjo botë është dhimbje e madhe dhe humbje e pazëvendësueshme për familjen, miqtë dhe kolegët e Luranit dhe lë një zbrazëti të madhe në artin dhe kulturën tonë shqiptare.
Skenës artistike teatrale e kinematografike do t’i mungojë talenti dhe profesionalizmi i Luranit, i cili me dashurinë, përkushtimin dhe angazhimin e tij për lojën skenike, arriti të depërtojë edhe në skenën ndërkombëtare. Lurani nuk e përfaqësoi vetëm veten e tij, por prezantoi edhe vlerat e artin shqiptar brenda hapësirave kombëtare dhe jashtë tyre.
I lehtë i qoftë dheu.
Pranoni ngushëllimet më të përzemërta e të sinqerta, ju e nderuar familje, miq, kolegë e ju dashamirë të Luranit. /InLajmi/
