Kryeministri i Kosovës, Albin Kurti, ka shprehur ngushllime për vdekjen e aktorit, Luran Ahmeti, përcjell InLajmi.
Kurti ka treguar se Luranin ka pasur fat ta takojë 3 vite më parë në një nga shfaqjet e tij, dhe se kohëve të fundit pandemia ia kishte penguar disa projekte, që as kush nuk e kishte menduar se do ja ndalte edhe ëndrrën.
Ai gjithashtu ka shprehu ngushëllim familjarëve dhe miqëve për aktorin Luran Ahmeti. /InLajmi/
Postimi i plotë i tij:
Luranin pata fatin ta takoj tre vite më parë. Në shfaqje dhe pas shfaqjes. Ai luante rolin e Robespierit, në pjesën “Vdekja e Dantonit”. Pata fatin ta shihja në skenë. Ishte fat sipas vetë Luranit. Ai thoshte se teatri ishte vendi ku bëhej aktori i vërtetë. Kohët e fundit pandemia ia kishte penguar disa projekte. Por askush nuk mund të mendonte se do t’ia ndalte ëndrrën.
E pashë pra Luranin në skenë, në vendin e ndërveprimit më intim të plastikës dhe cerebralit të aktorit. Si duket ishte nisur për të luajtur personazhe historikë. Do të kishim patur fatin ta shihnim më gjatë atë portret të plotë e të ngrohtë që dinte të merrte forma të ashpra dhe të prera. Ai po ngjitej modestisht në skenë. Një ditë jam i sigurtë se do t’i rikthehej Robespierit. Dhe jam i sigurtë se përsëri do ta shihja. Por, padrejtësisht ne humbëm një dispozitiv të lartë të teatrit. Ne humbëm Robespierin tonë te “Vdekja e Dantonit”.
Ngushëllime gruas Edlira, vajzës Arba, babait Xhabir, familjes së gjerë e miqve të shumtë të Luranit.
