Deputeti shqiptar nga Lugina e Preshevës në Parlamentin e Serbisë, Shaip Kamberi gjatë ditës së sotme i ka reaguar presidentit të Serbisë, Aleksandër Vuçiq për publikimin e flamurit serb mbi hartën e Kosovës, duke e quajtur si një provokim i cili i kontribuon përçarjes dhe urrejtjes ndërmjet2 popujve.
Në fjalimin e gjatë para legjislativit serb, Kamberi ka thënë se kjo politikë e provokimeve dhe nxitjes së tensioneve ndëretnike dhe rajonale e largon edhe më shumë vendin nga integrimet në Bashkimin Evropian.
“Konsideroj që fotografia të cilën presidenti e ka publikuar në rrjetet sociale është shenjë e qartë që ai nuk dëshiron marrëveshje me Kosovën pavarësisht përsëritjeve të shpeshta për ‘kompromisin e domosdoshëm’. Kjo politikë e provokimeve dhe nxitjes së tensioneve ndëretnike dhe rajonale e largon edhe më shumë vendin nga integrimet në Bashkimin evropian. Serbia besoj duhet të definojë rolin e vet dhe të bëjë një balanc më realist mes aspiratave dhe potencialeve të saja”, ka thënë Kamberi ndër të tjerash në fjalimin e tij.
Ai po ashtu ka pyetur kryeministren Bërnabiq se çka do të ndërmarr qeveria në parandalimin e zgjerimit respektivisht institucionalizimit të gjuhës së urrejtjes dhe provokimeve të cilat rrisin tensionin në rajon dhe çka do të ndërmarrë me qëllim të arritjes së marrëveshjes gjithëpërfshirëse për normalizimin e marrëdhënieve me Kosovën?
Ky është fjalimi i tij i plotë:
Zonja Brnabiq, gjuha e urrejtjes që po përdoret nga ministrat Tuaj e shoqëruar me heshtjen Tuaj, nuk i kontribuon as mardhënjëve ndëretnike, as marrëveshjes me Kosovën e as paqes në Ballkan.
Përndryshe, Zonja Brnabiq, a është ose jo e pavarur Kosova, ju e dini më së miri – Juve dhe ministrave Tuaj i nevojitet leje e veçantë për t’a vizituar Kosovën.
Që nga marrja e këtij mandati si deputet popullor, pavarësisht se si përjetohen fjalimet e mia këtu, unë jam munduar që të tërheq vërejtjen për nevojën e marrjes së masave në bazë të të cilave Republika e Serbisë do të ndalonte shpërndarjen dhe institucionilizimit të gjuhës së urrejtjes dhe provokimeve ndëretnike.
Kam folur për këtë fenomen, sipas meje, në gjuhën e rrjedhshme serbe, por unë dhe ju siç duket nuk flasim serbishte të njëjtë.
Kur këtë e kam bërë duke shfrytëzuar të drejtën time kushtetuese dhe kam folur në gjuhën amtare shqipe, jam ballafaquar me zhurmë të kolegëve të mi dhe mosgadishmëri që të më ndëgjojnë qoftë edhe për edhe 5 minuta.
E kuptoj, pavarësisht se jam zgjedhur në mënyrën e njëjtë si ju, pavarësisht se në aspektin formalo-juridik kam të njëjtat të drejta me ju, Unë këtu jam ”shqiptari imagjinar”. Paragjykime janë këto, të mbjellura për më shumë se një shekull në kujtesën kolektive të një populli.
Pa marr parasysh për këto, unë do të vazhdoj të flas rreth temave të cilët disa nuk po i pëlqejnë, por për të cilat konsideroj se janë vendimtare për respektimin e të drejtave të njeriut dhe pakicave, ndërtimin e shoqërisë demokratike, raporteve të mira ndërfqinjësore dhe për paqen afatgjate në Ballkanin Perëndimor.
