Pas publikimit të pamjeve ku shihet vrasja e Agonis Tetajt, dje në media është bërë publike një foto ku shihej avokati i familjes Gogaj, Besnik Berisha dhe prokurori i rastit Agron Uka, në një restorant në Gjilan.
Prokurori Uka për këtë rast ka thënë se takimi ka ndodhur tre vite më parë.
Ndërsa, avokati Berisha e kishte mohuar se ka qenë në takim me prokurorin Uka.
Mirëpo, Berisha i ftuar sot në emisionin Frontal në T7 e ka pranuar që ka qenë në takim me prokurorin Uka.
Ai ka thënë se ai del me koleg të tij dhe nuk ka se pse ta mohoj këtë.
Megjithatë ai e ka mohuar që në atë takim të jetë marrë ndonjë vendim për rastin.
“Unë nuk kam arsye t’i them dikujt që nuk rri, unë i kam kolegë ata. Nuk ka prokuror në këtë botë që ulet me pi një kafe e që merr vendim pa pasur prova”, ka deklaruar ai.
Berisha ka thënë se kishte kërkuar që rasti i vrasjes së Agonis Tetajt t’i kaloj Prokurorisë Themelore në Gjilan, pasi siç thotë ai, për shkak të kërcënimeve që kishte marrë xhaxhai i të akuzuarit në Pejë.
“Unë e kam kërkuar këtë për shkak të keqpërdorimeve e të dëshmive. Për shkak që siç më kanë treguar, kërcënimit që i është bërë xhaxhait të Shabanit, që nëse edhe njëherë dërgon njerëz për të kërkuar falje, do t’i dërgohen njerëz për ta arrestuar”, ka shtuar ai.
Berisha edhe njëherë ka pretenduar se vrasja ka qenë si pasojë e pakujdesisë, derisa ka thënë se një gjë e tillë do të dëshmohet.
