Pandemia e shfaqur ne vitin 2019 në Kinë, e njohur si Covid-19, e përhapur pastaj në gjithë botën shkaktoi një tollovi të madhe. Kjo pandemi u bë shkak në mbylljen e kufijve të shteteve, në mbylljen e istitucioneve shtetërore, madje edhe izolimin e qytetarëve brenda shtëpive të tyre, përcjellë InLajmi.
Koronavirusi shkaktoi edhe mbylljen e shkollave, çka e bëri këtë situatë edhe më të ndjeshme. Ministria e Arsimit e Kosovës u detyrua të krijojë platforma mësimi online, në mënyrë që nxënësit të mos ngecin prapa edhe me mësime.
Sot, në një vjetorin e fillimit të mësimit online në Universitetin e Prishtinës “Hasan Prishtina”, rektori Naser Sahiti tregoi për sfidën që e kanë kaluar gjatë këtij viti, ku tha se që nga 16 marsi i vitit të kaluar janë mbajtur 235.517 ligjërata virtuale në UP.
Rektori tha se vetëm në javën e parë kanë marrë pjesë rreth 25 mijë studentë në rreth 2000 ligjërata online.
“UP-ja dëshmoi aftësinë për adaptim të shpejtë të studentëve dhe stafit në platformat e mësimit virtual, ku në vetëm javën e parë të kalimit nga ligjëratat në klasa në platformat virtuale, UP-ja mbajti mbi 2 mijë ligjërata, në të cilat morën pjesë rreth 25 mijë student”
Sahiti përgëzon stafin akademik, administrativ dhe studentët për qëndrueshmërinë dhe kontributin e dhënë që UP-ja të arrijë objektivat e tij edhe në këtë situatë të jashtëzakonshme të krijuar nga pandemia
“Studentët dhe stafi dëshmuan maturinë, gatishmërinë dhe njohuritë e duhura për të shënuar sukses në mësimdhënie dhe mësimnxënie edhe në rrethanat e krijuara nga pandemia covid-19. Përveç në mësim, ata ishin të gatshëm edhe në organizimin e aktiviteteve të ndrzshme jashtë kurrikulare në mënyrë virtuale. Andaj, dua t’i përgëzoj studentët për sukseset e shënuara në mësim gjatë kësaj periudhe njëvjeçare, ndërkaq stafin për përkushtimin në punën e tyre, duke vazhduar kështu ta mbajnë UP-në si prijës të nismave jetike për shoqërinë tonë,” thotë rektori Sahiti.
Për mësimin në distancë ka folur edhe Verë Dugolli, studente e dalluar e këtij viti në Fakultetin e Edukimit. Ajo tha se përdorimi i teknologjisë në mësimdhënie ishte pikë pozitive falë fleksibilitetit dhe kreativitetit të mësimdhënësve. Përveç kësaj kursente kohë dhe ishte pa barriera gjeografike.
“Zbulimi i mëtejmë i botës teknologjike dhe zbatimi i saj në mësimdhënie ishte një pikë kthese tejet pozitive. Kreativiteti dhe fleksibiliteti i mësimdhënësve tanë me ndryshimin e metodologjive, me qëllim të adaptimit, na zëvendësoi sadopak interaktivitetin që na mungonte”- thotë Vera.
Në këtë ditë, UP-ja kujton edhe stafin e UP-së dhe qytetarët që humbën jetën në luftë me virusin Covid-19, si dhe vlerëson lart punën dhe profesionalizmin e stafit të Fakultetit të Mjekësisë, së bashku me studentët vullnetarë, të cilët dhanë kontribut vital për vendin në përballje me pandeminë e koronavirusit. /InLajmi/