Kryetari I Akademisë së Shkencave të Kosovës, Akademik Mehmet Kraja i bën lutje miqëve, shkrimtarëve, gazetarëve, politikanëve, burrave dhe grave nga jeta publike që të shkruajnë gjuhën shqipe pa gabime, ngase shumica nga ata dinë gjuhë të huaja, flasin mirë anglisht mirëpo kur vjen puna për të shkruar shqip, bëjnë gabime drejtshkrimore, përcjellë InLajmi.
Ky reagim i Krajës vjen pas rastit kur tek një mik i tij, ai kishte hasur në një ë të tepërt, në tekstin prej 7-8 rreshtash. Ai thotë se sot ekzistojnë mundësi të shumta që të mos bëjmë gabime drejtshkrimore.
Postimi i plotë i tij:
Miq, shkrimtarë, profesorë, gazetarë, politikanë, ambasadorë, burra dhe gra te jetës publike, e kam një lutje për ju: Mësoni të shkruani shqip, Zoti qoftë me ju! Shumë nga ju keni mësuar gjuhë të huaja, flisni mirë anglisht, por kur vjen puna për të shkruar, përdorni korrektorin dhe përpiqeni ta bëni shkrimin sa më të kultivuar. Po shqip? Nuk flas për komunikimin e shpejtë, se ai durohet disi, por kur doni të komunikoni me një audiencë më të gjerë, bëni kujdes, sepse gjuha tregon jo vetëm kulturë e dije, por edhe dinjitet, nivel intelektual dhe përkatësi. Dje-pardje mbeta i çmeritur, kur pashë te një mik imi një ë të tepërt, në një tekst të prej 7-8 rreshtash. Ajo ë bërtiste deri në çmenduri në mes të atij teksti, sepse nuk e kishte vendin aty! Gjuha shqipe është e vështirë në shkrim, por njerëzit mësojnë kinezisht jo më gjuhën amtare! I keni mundësitë, keni “korrektorin kompjuterik”, keni fjalorë të ndryshëm, keni edhe fjalorë drejtshkrinorë! Unë e dua gjuhën shqipe, është gjuha më e mirë në botë! Duajeni edhe ju, se kujdesi për të ju nderon!
M.K /InLajmi/