Një 57-vjeçar nga Kosova është arrestuar nga Policia në pikën kufitare në Morinë.A.B, nga fshati Tërnavë ishte i shpallur në kërkim ndërkombëtar nga Misioni i Kombeve të Bashkuara në Kosovë (UNMIK), për “vrasje në tentativë në rrethana rënduese” dhe “mbajtja e armëve luftarake”.
Sipas njoftimit nga Policia e Shtetit në Shqipëri, ai do të ekstradohet për veprime të mëtejshme.
“Vihet në pranga me qëllim ekstradimi drejt Kosovës, një shtetas i shpallur në kërkim ndërkombëtar, për veprat penale “Vrasje e ngelur në tentativë në rrethana rënduese” dhe “Mbajtja pa leje e armëve luftarake”,thuhet në njoftim të Policisë Shqiptare.
“Në hyrje të Pikës së Kalimit Kufitar Morinë, shërbimet e Policisë Kufitare si rezultat i masave të shtuara dhe shkëmbimit të informacionit me Interpol Tiranën, kanë ndaluar një shtetas të shpallur në kërkim ndërkombëtar: A.B, 57 vjeç, banues në Tërrnave, Kosovë”,thuhet tutje në njoftim.
Policia e Shtetit ka bërë të ditur se gjatë përpunimit dhe verifikimit të të dhënave në sistem, ky shtetas rezultoi person në kërkim ndërkombëtar nga UNMIK Kosovë, për veprat penale “Vrasje e ngelur në tentativë në rrethana rënduese” dhe “Mbajtja pa leje e armëve luftarake”, parashikuar nga Kodi Penal i Kosovës”, shkruan Indeks Online.
“Në përfundim të veprimeve hetimore, specialistët e Sektorit për Hetimin e Krimit në DVP Kukës bënë arrestimin provizor të tij, me qëllim ekstradimin në shtetin e Kosovës, mbështetur në “Konventën Evropiane të Ekstradimit” të vitit 1957”, bën të ditur Policia Shqiptare.
