Ish deputetja e Kuvendit të Kosovës, Alma Lama, nuk do të jetë pjesë e legjislaturës së ardhshme.
Lidhur me këtë, Lama ka folur në emisionin e mëngjesit “Sytë 7” në Klan Kosova, duke thënë se nuk është në pritje të asaj se çfarë do të publikojë KQZ-ja dhe se nuk ka pritur rezultat më të mirë për shkak të hyrjes së saj së vonshme si kandidate për deputete.
“Nga rezultatet deri tani, nuk besoj. Megjithëse kam marrë shumë pak rezultate dhe nuk është se po pres ato çfarë do të publikojë KQZ, por nuk kam pritur as më mirë për shkak se kam hyrë tepër vonë dhe e kisha të pamundur të bëjë fushatë elektorale për një periudhë të shkurtë”.
Ndër të tjerash Lama tha se rinumërimi i votave në QNR do të ishte më i besueshëm për kandidatët për deputetë pasi siç thotë ajo, do t’ju ofrohej transparencë më e madhe.
“Kam thënë që procesi do të ishte më i mirë dhe i besueshëm në qoftë se do të rinumëroheshin votat edhe në QNR. Nuk kam akuza ndaj ndonjë subjekti politik por duke pasur parasysh parregullsitë që kanë ndodhur në të kaluarën, mendoj që kandidatëve për deputetë do t’ju ofrohej një transparencë më e madhe nëse do të rinumëroheshin votat. Por më e mira do të ishte që votat të skanoheshin sikur që ndodh në vendet e tjera në mënyrë që të hiqej çdo manipulim që mund të ndodhë në qendrat e numërimit”.
“Unë kam qenë në LDK nga viti 2013 dhe në 2014 jam zgjedhur deputete me LDK. Prej aty kam shkuar me mision në Itali dhe jam kthyer sërish në shtëpinë time në LDK”.
Poashtu, Lama tregoi një nga arsyet se pse LDK pësoi humbje në zgjedhjet e 14 shkurtit.
“Rezultati ishte goxha i papritur megjithëse kishim indikacione nga sondazhet por jo për një rezultat të tillë. Neve na mbetet të bëjmë analiza se pse ka mbërritur këtu por një nga arsyet lidhet me sulmet e jashtëzakonshme që LDK ka pasë në media, nga kundërshtarët politik, shumë shpesh të padrejta në lidhje me punën që ka bërë LDK”.
