Dita e premte nuk i shkoj edhe aq mirë një punëtori të ndërtimit, pasi që siç raportohet ai ka rënë nga lartësia e objektit ku ishte duke punuar, shkruan InLajmi.
Zëdhënësja e Policisë së Kosovës për Rajonin e Prishtinës, Flora Ahmeti tregon për InLajmin se në vend të ngjarjes kanë dalë menjëherë policia të cilët po merren rastin.
“Rreth orës 11:15 është raportuar për një person të rënë nga lartësia e një objekti. Policia menjëherë ka dalë në vendin e ngjarjes dhe po punon për zbardhjen e rrethanave që karakterizojnë rastin. Po ashtu janë ftuar edhe ekipet mjekësore për dhenien e ndihmës së nevojshme”,ka deklaruar Ahmeti.
Ndërsa në një përgjigjje ekskluzive për InLajmin, SHSKUK ka thënë se se ekipet mjekësore të Klinikës Emergjente menjëherë kanë ofruar kujdesin mjekësor emergjent ndaj të lënduarit, i cili është rrëzuar në vendin e punës.
Ndërkaq i lënduari në fjalë ende gjendet në Klinikën Emergjente për diagnostikë dhe trajtim të mëtejmë mjekësor.
“Një person i moshës 46 vjeçare është sjell rreth orës 12:03 në Klinikën Emergjente me autoambulancë të Qendrës së Mjekësisë Urgjente në Prishtinë, për shkak të rrëzimit nga lartësia në vendin e tij të punës. Ekipet mjekësore të Klinikës Emergjente menjëherë kanë ofruar kujdesin mjekësor emergjent. I lënduari në fjalë ende gjendet në Klinikën Emergjente për diagnostikë dhe trajtim të mëtejmë mjekësor”,thuhet bë përgjigjjen e SHSKUK-së./InLajmi/
