Duket se i gjithë presioni për të rinisur menjëherë dialogun që i erdhi nga Shtetet e Bashkuara, Gjermania dhe Franca së fundi në letrat e tyre të urimit nuk po i lë shumë përshtypje Albin Kurtit – kryeministrit në ardhje.
Kurti, partia e të cilit doli bindshëm më e votuara në zgjedhjet e 14 shkurtit, në një intervistë për Le Temps nga Zvicra ka kritikuar në mënyrë indirekte Bashkimin Evropian për mos-dhënien e një afati për integrim, por edhe për Procesin e Berlinit.
Lideri i Vetëvendosjes ka thënë se do të rishikojë “procesin e Berlinit”.
Procesi i Berlinit është një iniciativë bashkëpunimi ndër-qeveritare që ka për synim ri-vitalizimin e marrëdhënieve mes Ballkanit Perëndimor dhe shteteve të caktuara të Bashkimit Evropian, për një përmirësim të bashkëpunimit rajonal në Ballkanin Perëndimor në çështjet e infrastrukturës dhe zhvillimit ekonomik.
Në vend të procesit të Berlinit, ku anëtare veç Kosovës janë edhe 15 shtete të tjera, Kurti po kërkon një Plan Marshall.
Plani Marshall, i njohur zyrtarisht si Programi i Rimëkëmbjes Evropiane, ishte një iniciativë amerikane e vitit 1948 për ndihma ndaj Evropës Perëndimore të shkatërruar në Luftën e II Botërore. Qëllimet e ShBA-ve kishin qenë rindërtimi i rajoneve të dëmtuara nga lufta, heqja e barrierave tregtare, modernizimi i industrisë, përmirësimi i prosperitetit evropian dhe parandalimi i përhapjes së komunizmit, shkruan Periskopi.
Sidoqoftë, Kurti e vë theksin te “demokratizimi, shteti i së drejtës dhe arsimimi i brezit të ri”.
Edhe Bashkimi Evropian ka kërkuar ri-nisjen e dialogut të Kosovës me Serbinë, ndërkohë që Kurti e ka ripërsëritur se kjo temë nuk është prioritare për të, duke qenë se nuk është prioritare për qytetarët e Kosovës.
Përgjigjja e plotë:
Integrimi nuk do të ndodhë në një të ardhme të afërt, por BE duhet të na japë një afat, në mënyrë që qytetarët e rajonit të kenë një shpresë. Ne gjithashtu duhet të rishikojmë procesin e Berlinit për ta shndërruar atë në një Plan të vërtetë Marshall, me theks në demokratizimin, shtetin e së drejtës dhe arsimimin e brezit të ti. Ish-presidenti Trump pëlqente “faktet dhe interesat” dhe ne duhet t’i shtojmë kësaj “vlerat dhe parimet”. Shpresoj që Brukseli dhe Uashingtoni të jenë në të njëjtën gjatësi vale për marrëdhëniet mes Kosovës dhe Serbisë, ashtu si edhe Berlini dhe Parisi. Na duhet ky sinkronizim i dyfishtë, ky është çelësi i suksesit.
