Lideri i VV-së, Albin Kurti ka gjetur kohë të shkojë në Shqipëri dhe t’i ndihmojë Vetëvendosjes atje për zgjedhjet parlamentare të 25 prillit, ku do të garojë me 3 kandidatë në Qarqet e Tiranës, Lezhës dhe Gjirokastrës, përcjellë InLajmi
Lëvizja VETËVENDOSJE – Qendra në Shqipëri, ka njoftuar se Kurti po qëndron atje ku së bashku me disa anëtarë të Kryesisë për t’i ndihmuar për mbledhjen e nënshkrimeve.
Ndërsa kanidatët në Shqipëri për zgjedhjet e 25 prillit janë Boiken Abazi, Iliaz Shehu dhe Kreshnik Merxhani.
Postimi i plotë i VV-së në Shqipëri:
Gjatë këtij muaji ka vijuar mbledhja e nënshkrimeve nga qytetarët banues në Qarqet e Tiranës, Lezhës dhe Gjirokastrës, për tre kandidatët nga zgjedhësit të mbështetur nga Lëvizja VETËVENDOSJE! në Shqipëri për zgjedhjet e 25 prillit: Boiken Abazi, Iliaz Shehu dhe Kreshnik Merxhani.
Prej Albin Kurtit dhe disa anëtarëve të kryesisë së LVV në Kosovë, të cilët kanë edhe nënshtetësi të Shqipërisë, tek sopranoja me famë ndërkombëtare Inva Mula, prej ish-drejtorit të Teatrit të Operas dhe Baletit Ilir Kerni, tek gazetari Blendi Salaj e shumë gazetarë të tjerë, bashkë me banorët e qytetit dhe fshatrave të Tiranës, të Kamzës, Rogozhinës, Lezhës, Gjirokastrës, Përmetit etj, mbështetja e qytetarëve me firmat e tyre vazhdon për kandidatët dhe për projektin politik të LVV në Shqipëri.
Nga ana tjetër, 3 kandidatët dhe aktivistët janë angazhuar çdo ditë në takime me qytetarë në rrugë e vende publike për të grumbulluar numrin e nevojshëm të nënshkrimeve që do të çojnë përpara tre kandidaturat në KQZ, drejt zgjedhjeve parlamentare të 25 prillit. Puna në terren do vijon, ndaj ftojmë të gjithë qytetarët që ende nuk e kanë dhënë nënshkrimin e tyre në këto tre qarqe, të takohen me aktivistët e të firmosin formularin e KQZ-së./InLajmi/
