Doli nga shtypi komedia më e re “Iku autobusi”, i gazetarit dhe autorit tashmë të njohur Osman Goranci, shkruan InLajmi.
I lindur me 1956, në Kryeqytetin shpirtëror e kulturor të shqiptarisë ku e dhe jeton, Goranci është autor i dhjetra komedive dhe dramave, të inksenuara në skenat e ndryshme të vendit, të cilat me cilësi i kanë joshur si shikuesit, publikun në sallë ashtu edhe kritikën teatrore.
Deri më tani i ka të botuara 7 komedi e drama, dhe është laureat i disa Çmimeve kombëtare e mbarëkombëtare: Çmimi parë në Konkursin mbarëkombëtar të dramës, “Beqir Musliu 2013”, me dramën “Zonja me maskë” Çmimi i tretë në Konkursin kombëtarë të dramës origjinale shqipe “Katarina Josipi 2014”, me komedinë “E di Lulebora”. Çmimin “Krijues i vitit 2017” nga Komuna e Prizrenit, Çmimin e parë në Konkursin kombëtar për dramë origjinale shqipe “Kastarina Josipi 2019”, me komedinë “Gratë dhe Napoleoni”.
Dy komeditë e Osman Gorancit, “Gruaja e drejtorit”, në interpretim të Teatrit të qytetit të Prizrenit, dhe “Aufwiederse-hen”, në interpretim të Teatri “Hasan Prishtina” në Vushtrri, në vitet 2012 dhe 2013, u shpallën shfaqjet më të mira në Festivalin tradicional të Komedisë në Mitrovicë.
Edhe pse tani po e sheh dritën e botimit, shfaqja e kësaj komedie është punuar enkas për Teatrin e qytetit të Prizrenit në vitin 2018 dhe veçmas në Premierë dhe reprizat, në Shëpinë e Kulturës “Xhemajli Berisha” në Prizren, si dhe në Festivalin e komedisë “Mitrovica 2018, (ku zuri vendin e dytë), pati dhe thyerje rekorde për shikueshmëri.
Dhe, Jo vetëm kjo komedi, por edhe komeditë dhe dramat e tjera, të realizuara dhe shfaqura në Prizren, Gjilan, Suharekë, Vushtri, Prishtinë, Ulqin, Gjakovë, Mitrovicë etj, i mbushnin sallat e Teatrove, gjë që mund të konkludojmë se komeditë dhe dramat e Gorancit, me interesim po mirëpriten nga aderuesit e Teatrit./InLajmi/
