Kandidati i LDK-së për kryeministër, Avdullah Hoti, tha në tubimin zgjedhor në Rahovec se qytetarët e Kosovës nuk duhet të mashtrohen më 14 shkurt nga “njerëzit që shpërndajnë shirita të kuq rrugëve” duke iu referuar Vetëvendosjes, përcjell InLajmi.
Madje ai ka përmendur disa qytete ku ka thënë se VV ka vendosur shirita të kuq pasi që është duke qeverisur, dhe këtë e konsideron si shenjë e sistemeve komuniste
“Mos u mashtroni. Merrni shembull Prizrenin që qeveriset nga ata që vendosin shirita të kuq rrugëve që është shenjë e sistemeve komuniste. Merrni shembull Podujevën ku kryetari i ri është denoncuar nga një qytetar për sulm fizik. Pra, shihni çfarë shembujsh keni nga ata që po pretendojnë ta qeverisin Kosovën. Unë dua të them më zë të qartë se vetëm LDK-ja garanton qeverisje normale në këtë vend. E kemi dëshmuar këtë, pasi kemi qeverisur me integritet të lartë gjithmonë dhe duke qenë në shërbim të qytetarëve”.
Hoti gjithashti shpalosi detaje nga plani për qeverisjen e ardhshme duke u fokusuar në bujqësi, duke premtuar revulucion në këtë sector.
“Ne ju kemi dalë në ballë premtimeve tona. Kemi dyfishuar subvencionet në bujqësi që filluan të shpërndahen sot. Në vazhdim kemi plan ambicioz në bujqësi me projektin për sistemin e ujitjes së tokave bujqësore që do të bëjë revolucion në këtë sektor”.
Sipas tij të arriturat e deritanishme të LDK-së janë garanci për fitore më 14 shkurt.
“E kemi hapur vendin ndaj miqve tanë dhe sikur i çon Zoti të mirat një nga një të vjen mbështetja amerikane për ushtrinë, marrëveshja për 1 miliard euro investime, njohja nga Izraeli dhe të tjera. Me mënyrën si qeverisim kemi me i heq vizat në këtë vit. Neve na besojnë kudo në Evropë. Jemi në rrugë të mbarë dhe jam i bindur, pas takimeve të shumta në terren, se të dielën do ta mbyllim me fitore, sepse i kemi thënë të gjitha të vërtetat të cilat janë kuptuar drejt nga qytetarët”. /InLajmi/
