Sejdi Hoxha, kandidat për deputet nga radhët e PDK-së, ka thënë së prioritet mbetet ekzekutimi i projekteve të rrugëve Prishtinë-Pejë, asaj në Komoran, Drenas, Skënderaj dhe rruga Prishtinë-Mitrovicë.
“Te projektet e mëdha mbeten autostrada që lidhë Gjilanin, Anamoravën dhe Prishtinën përmes autoudhës e cila është me standarde ndërkombëtare dhe me theks të veçanë ofron mundësi për Luginën, Bujanocin me Preshevën”, ka thënë Hoxha.
Po ashtu prioritet tjetër, sipas tij, janë edhe investimet në sektorin hekurudhor që janë shumë të rëndësishme për zhvillimin ekonomik të vendit.
“Në këtë rast ka pasur vonesa, por e mira është që ka filluar ekzekutimi i këtij projekti, mirëpo duhet të ndërrohet kahja e shtratit të hekurudhës. Për herë të parë kemi me ua mundësu që treni i cili niset prej Evropës në të njejtën linjë të kalojë edhe nëpër Fushë Kosovë e deri në Maqedoni dhe në kthim në Serbi dhe vendet e Evropës”, ka theksuar ish deputeti.
Në programin e PDK-së, tha tutje Hoxha, është edhe infrastruktura e turizmit malor dhe ajo e ndihmës së shpejtë.
Xhavit Zariqi, kandidat për deputet nga AAK, thotë se prioritet është që të përfundojnë projektet që janë në përfundim e sipër.
“Autostrada e Dukagjinit është pikë tjetër gjithsesi, edhe pikat turistike siç është Brezovica, deri në qendër të skijimit, që duhet të intervenohet, sepse është në interes të turizmit dhe zhvillimit ekonomik. Rruga Ferizaj-Qafë e Dulës është me rëndësi, përgatitja për infrastrukturën e gazit”, tha ndër të tjera Zariqi.
