Laura Pula, koordinatore nacionale e zgjedhjeve nga Prokuroria e Shtetit në një intervistë për Telegrafin ka thënë se sistemi prokurorial ka vetëm një rol në zgjedhjet e 14 shkurtit, “Të mbrojë votën e qytetarëve”.
Sipas saj, kushdo që cenon votën e qytetarit do të arrestohet dhe ndalohet në ditën e zgjedhjeve.
“Sistemi Prokurorial në tërësi dhe Prokurori i Shtetit e ka të vetmin rol në këto zgjedhje dhe në ato paraprake, mbrojtjen e votës së lirë të qytetarit. Prokurori i Shtetit është gardian i mbrojtjes të votës së lirë të qytetarit dhe kisha apeluar tek të gjithë që mos ta cenojnë votën e qytetarit, qoftë vet votuesit apo në çfarëdo mënyre edhe zyrtarët përgjegjës, se do të ballafaqohen me forcën e ligjit dhe fatkeqësisht do të arrestohen dhe do të ndalohen në ditën e zgjedhjeve”,ka thënë Pula.
Prokurorja Pula po ashtu tregoi se kanë krijuar memorandum bashkëpunimi me disa institucione në këto zgjedhje.
“Edhe pse këto zgjedhje na erdhën si zgjedhje të jashtëzakonshme dhe Sistemi Prokurorial me iniciativën e Prokurorit të Shtetit i kemi finalizuar të gjitha dokumentet strategjike të cilat na bëjnë pjesë e memorandumit të bashkëpunimit në mes të gjitha institucioneve relevante siç janë: Policia e Kosovës, KQZ-ja, PZAP-ja, KGJK-ja dhe Komisioni i Pavarur i Mediave. Ne kemi përfunduar procedurat standarde të veprimit, të cilët kryesisht nënshkruhen me qëllim të efikasitetit dhe reagimit sa më të shpejt të zgjedhjeve, ndërmjet kryeprokurorit të shtetit dhe drejtorit të Policisë së Kosovës”,u shpreh ajo.
Pula po ashtu theksoi se në të territorin e vendit për zgjedhjet e 14 shkurtit janë caktuar 88 prokurorë, të përcjell nga 40 prokurorë të sistemit prokurorial.
“Kemi caktuar 88 prokurorë kujdestar të cilët do të jemi të vendosur në tërë territorin e Republikës së Kosovës, të përcjell nga 40 prokurorë të tjerë nga sistemi prokurorial. Ata do të punojnë në ekipe të përbashkëta me hetuesit e policisë. Në ato vende ku nuk ka vende për prokurorët, ata do të qëndrojnë në zyrat e stacioneve policore dhe do të koordinojë punën bashkë. Qëllimi i vetëm i këtij komunikimi të ndërsjellët në mes të prokurorisë dhe policisë ka treguar se në momente të caktuara kemi reaguar me kohë nëse dikush ka tentuar të manipulojë me votën e qytetarit apo nëse ka kryer vepër penale”,tha prokurorja Pula.
