Ligji për Rimëkëmbje Ekonomike i Qeverisë së Kosovës, nuk do ta ndihmojë shumë komunën e Prishtinës, tha nënkryetari i kësaj komune, Muhedin Nushi, në një intervistë për Ekonomia Online, duke shtuar se planifikimi i buxhetit për këtë vit është 6.3% më i vogël se që ka qenë vitin që e lamë pas.
“Ligji i Rimëkëmbjes së Qeverisë nuk do ta ndihmojë shumë komunën e Prishtinës. Ne do të ballafaqohemi edhe gjatë këtij viti me masa të ndryshme të cilat do t’i ndërmarrim. Vitin e kaluar kemi marrë një mori masash të cilat e kanë kap vlerën 10 milionë euro me të gjitha masat e aprovuara qoftë atë për rimëkëmbje të bizneseve qoftë për skema sociale. Edhe për këtë vit i kemi të parapara disa prej ndihmave por varësisht prej situatës do të veprojmë edhe ne. Na për Covid veç kemi filluar pagesat gjatë vitit të kaluar. Në vitin 2020 kemi paguar 437 qytetarë të komunës së Prishtinës ku shuma totale është afër 20 mijë euro. Në ndërkohë derisa të hapet thesari ne kemi vazhduar me azhormimin e atyre të dhënave me kontakte me qytetarë të cilët nuk i kanë plotësuar të dhënat në formë të duhur dhe aktualisht e kemi listën prej 7 mijë qytetarëve të cilët do të marrin ndihmën në ditën e parë kur të hapet thesari. Po shpresojmë shumë që thesari do të hapet të hënën dhe ne do të mund të fillojmë me transaksionet të tyre. Ekipi prej dhjetë vjetëve punon vazhdimisht në kontakte me familjarë”, shtoi ai.
Tutje, Nushi tha se komuna e Prishtinës në skemën sociale i ka mbi 1500 familje që ndihmohen edhe nga Qeveria.
“Aktualisht në skemën sociale komuna e Prishtinës i ka mbi 1500 familje që ndihmohen dhe nga Qeveria. Edhe për tre muajt e ardhshëm do t’i marrin ka dy paga. Komuna e Prishtinës i ka ndihmuar familjet me pako ushqimore, higjienike dhe dru për ngrohje, afër 300 familje”, u shpreh ai.
Planifikimi buxhetor i Komunës së Prishtinës për vitin 2021 është 85 milionë e 792 mijë.
“Planifikimi buxhetor për vitin 2021 është 85 milion e 792 mijë që i bie se 6.3% buxheti më i vogël se që ka qenë vitin e kaluar. Buxheti është i bazuar në 100 premtimet e kryetarit të Prishtinës, Shpend Ahmetit, jo vetëm i këtij viti por edhe i tre vjetëve paraprake. Do të mundohemi t’i realizojmë 100 pikët por edhe të shpenzojmë buxhetin në formë maksimale”, shtoi Nushi.
Tutje, nënkryetari Nushi tha se disa nga planet e komunës së Prishtinës për vitin 2021 është fillimi i ndërtimit të rrugës “A”, si ndërtimi i një ndërtese për autizëm.
“Disa prej projekteve me rëndësi infrastrukturore të cilat janë të parapara gjatë këtij viti është parku te Qafa, Posta kryesore. Për herë të parë do të ndërtohet në regjion një ndërtesë për autizëm sepse asnjë kryeqytet në regjion nuk e ka këtë objekt dhe do të bëjmë në bashkëfinancim më Tikën dhe renovimin e xhamisë në qendër të qytetit. Do të rinovohet strehimorja e fëmijëve. Ka filluar ndërtimi i strehimores të qenve endacak. E kemi parkun nën tokësor te fakulteti filozofik. Po ashtu është zona e ngushtë e kryeqytetit të parkingut nëntokësor do të transformohet në rrugë një kahore. Janë projekte të rëndësishme dhe lajmi më i mirë për qytetarët është fillimi i ndërtimit të rrugës A në bashkëfinancim me Ministrinë e Infrastrukturës”, u shpreh ai për Ekonomia Online
Ndërsa sa i përket masave kufizuese të Qeverisë për parandalimin e përhapjes së virusit, nënkryetari i Prishtinës është shprehur kundër këtyre masave, duke thënë se zonimi i qyteteve nuk duhet të aplikohet.
Sipas tij, masat duhet të merren në nivel të shtetit dhe jo vetëm në disa qytete.
“Nuk kemi pasur ndonjë kosult direkte me nivelin qeveritar por ne si komunë jemi të gatshëm të ofrojmë mundësinë e shtrirjes së qytetarëve të infektuar nga Covid-19 jemi të gatshëm me kapacitete deri në 400 shtretër duke përfshirë Qendrën e Mjekësisë Familjare në Kodër të Trimave dhe Emshir. Prandaj jemi të gatshëm në çfarëdo situate. Jo, vetëm Prishtina e Fusha Kosova por i kemi edhe ato në rrethinë që janë të përfshirë në zonën e kuqe dhe ne që në fillim kemi deklaruar se jemi kundër zonimit të kryeqytetit posaçërisht për bizneset dhe qytetarët. masat lehtësuese duket se kanë pasur sukses në gastronomi”.
“Masat duhet të merren në nivel të shtetit dhe jo të zonimit të qyteteve. Zonimi bëhet në baza javore. Dhe kjo nënkupton që Prishtina shumë vështirë se mund të dalë nga zona e kuqe ose nuk do të dalë asnjëherë derisa të eliminohen këto zonimet e qyteteve. Duke pasur parasysh se numri më i madh it ë infektuarve dhe i testuarve kryhet pikërisht në kryeqytet. Tollovitë e mëdha që janë krijuar nga qeveria. Jemi për lirim të masave sepse nëse duhet të ashpërsojmë masat duhet fillimisht në kuadër të shtetit respektivisht që të mbyllim kufijtë nëse eventualisht do të ketë eskalim të situatës me pandeminë por jemi për lirim të kontrolluar të masave”, shtoi Nushi.
