Ministria e Punëve të Jashtme dhe Diasporës Meliza Haradinaj-Stublla ka pritur në takim të Dërguarin Special të Mbretërisë së Norvegjisë për Ballkanin, Arne Sannes Bjørnstad dhe Ambasadorin Norvegjez në Prishtinë, Jens Erik Grøndahl, përcjell InLajmi.
Haradinaj tregoi se diskutuan gjerë e thellë për çështjet e Ballkanit dhe raportit të ndërlikuar Kosovë – Serbi.
Ajo më tutje tha Kosova për më shumë së një dekadë, ka qenë e përkushtuar dhe e angazhuar në dialog pa një përfundim .
Ndërsa theksoi se tani Kosovës i duhet një përfundim në lidhje me dialogun në mënyrë që të ndodh njohja e ndërsjellë së shpejti dhe se shtetet e Ballkanit Perëndimor përfundimisht të hyjnë në agjendën euro-integruese.
Postimi i plotë i saj:
Kosova është e gatshme për dialog me epilog
Prita sot në takim të Dërguarin Special të Mbretërisë së Norvegjisë për Ballkanin, z. Arne Sannes Bjørnstad dhe Ambasadorin Norvegjez në Prishtinë, z. Jens Erik Grøndahl.
Duke qenë se Ambasadori Bjørnstad është njohës i mirë i çështjeve të Ballkanit dhe raportit të ndërlikuar Kosovë – Serbi, diskutuam gjerë e thellë kompleksitetin e kësaj çështjeje.
Kosova për më shumë së një dekadë, ka qenë e përkushtuar dhe e angazhuar në dialog, por pa epilog. Tani, Kosovës dhe Serbisë i duhet dialog me epilog, dhe kjo duhet të ndodhë të afat sa më të shkurtër – që të ndodhë njohja e ndërsjellë në kufijtë ekzistues, dhe shtetet e Ballkanit Perëndimor përfundimisht të hyjnë në agjendën euro-integruese. Ky ishte mesazhi që përcolla sot, duke theksuar gatishmërinë e Kosovës për të respektuar një agjendë të definuar të dialogut në aspektin kohor, nën lidershipin e SHBA-ve dhe në koordinim me BE-në, gjithnjë duke ruajtur tri parimet e panegociueshme të Kosovës: integritetin territorial, rendin Kushtetues, dhe karakterin unitar të vendit.
Falënderova Norvegjinë për përkrahjen ndaj Kosovës, duke vlerësuar marrëdhëniet e mira mes vendeve tona. Po ashtu presim që Norvegjia të jetë mbështetëse e Kosovës tonë në aspiratën për anëtarësim në NATO, për të zgjeruar diametrin e sigurisë dhe stabilitetin në rajon edhe më gjerë.
Teksa Kosova është drejt procesit zgjedhor, bëra të ditur se nuk do të ketë asnjë vakum institucional, dhe se do të vazhdojë traditën e zgjedhjeve të lira e demokratike./InLajmi/
