Gjykatësi francez i Speciales, Nicollas Guillou ia ka refuzuar kërkesën për lirim ish-zëdhënësit të UÇK-së, Jakup Krasniqi. Në arsyetimin e tij, Guillou ka rrëzuar shumicën e argumenteve të mbrojtjes, duke i dhënë të drejtë Prokurorisë së Specializuar për ta lënë në paraburgim Jakup Krasniqin.
Ish-zëdhënësit të UÇK-së, Jakup Krasniqi, për ish-këshilltarin e Kurtit, Shkelzen Gashi, është përdorur si argument nga Gjykata Speciale për t’ia vazhduar atij paraburgimin.
Gjykatësi francez thekson se Krasniqi në pozitën e zëdhënësit të UÇK-së ishte i përfshirë në shpërndarjen e politikave të UÇK-së dhe Shtabit të Përgjithshëm të saj. Guillou thotë se përkundër se kanë kaluar 20 vite që kur Krasniqi mbante këtë pozitë, postimi i tij për Shkelzen Gashin është provë se ai i mendon si “kolaboracionist” të gjithë ata që mendojnë se UÇK ka kryer krime gjatë luftës së fundit në Kosovë.
“Për sa i përket rrezikut për të penguar procedurat e KS, gjyqtari i procedurës paraprake kujton se Z. Krasniqi, si zëdhënës i UÇK-së, ishte i përfshirë në zhvillimin dhe shpërndarjen e politikave të UÇK-së përmes hartimit dhe / ose lëshimit të komunikatave apo deklaratave politike të Shtabit të Përgjithshëm, shumë prej të cilave u drejtoheshin kundërshtarët e UÇK-së. Gjykatësi i Procedurës paraprake është i vetëdijshëm se kanë kaluar njëzet vjet që kur janë bërë deklarata të tilla dhe se Z. Krasniqi tani është në pension dhe nuk mban më pozicione publike. Sidoqoftë, Postimi në Facebook i 24 Prillit 2020 tregon se, edhe pas njëzet vjetësh, z. Krasniqi akoma etiketon si “bashkëpunëtorë” në “shërbimin e politikës së gjenocidit të Millosheviçit” çdo person i cili guxon të deklarojë se anëtarët e UÇK-së kishin kryer krime”, thekson gjykatësi Guillou.
“Është e parëndësishme nëse kjo deklaratë është drejtuar kundër Z. Gashi posaçërisht; gjuha e saj synon qartë këdo i cili shpreh pajtim me akuzat, përfshirë ato të raportit të 2010-tës i përgatitur nga raportuesi special Dick Marty”, theksohet tutje në arsyetimin e gjykatës.
Ky postim i Krasniqit është përdorur si argument kryesor nga Gjykata Speciale për t’ia refuzuar kërkesën për lirim atij, duke theksuar se përkundër kushteve të propozuara nga mbrojtja për lirimin e ish-zëdhënësit të UÇK-së, bindjet e tij dhe shprehja publike e tyre për “kolaboracionistët” mund të ndikojë që përkrahësit e Krasniqit të kryejnë veprime që bien ndesh me procedurën që aktualisht po zhvillohet kundër tij.
Për këto arsye dhe arsye të tjera, Gjykatësi ia ka refuzuar Krasniqit kërkesën për lirim, njëjtë siç ka vepruar me kërkesën e avokatit të Hashim Thaçit, Kadri Veselit e Rexhep Selimit, shkruan Lajmi. net.
Më poshtë keni statusin e Jakup Krasniqit të shkruar më 24 prill për Shkelzen Gashin:
Unë pres që organet drejtuese të LVV-së, kuptohet nëse Ato janë funksionale, të distancohen seriozisht nga “patriotizmi i Dick Martit”!Nëse ato nuk distancohet, atëherë ato janë politika të VV-së.
Disa shqipfolës kur i dëgjon e i sheh se si e çka flasin, nuk ka si mos të të vije keq për cektësinë e mendimit që shfaqin në publik, ndoshta nuk është edhe faji i tyre, flasin aq sa edhe dinë. Disa njerëz, kur flasin e shkruajnë për shekujt e robërisë apo për pak vitet e Lirisë, tërë mllefin e tyre e shfryjnë ndaj kontribuuesve të Lirisë e të Lavdisë, kuptohet në krahasim me shekujt e shumët të robërisë!
Edhe sot në medie tona, pretenduesit e majave shtetërore apo ata që janë ngritur në majat shtetërore e bëjnë të njëjtën gjë, sikur vërtet nuk kanë probleme të tjera për rreth tyre, por problemet i kërkojnë dhe i shohin vetëm e vetëm brenda përbrenda kombit e shtetit apo shteteve që i krijuan të virtytshmit e kombit. Mbase edhe nuk kanë faj pasi lloji i njerëzve që kurrë atdheut e kombit nuk ia bënë ndonjë argat për të qenë, kaq shohin e kaq dinë, mbase edhe kaq bëjnë! Të paditurve edhe nuk duhet tua zëmë për të madhe! Kur heshtin të urtët e virtytshëm, axhamive u falet hapësira e veprimit!
Është në natyrën e njeriut të flet atë që dinë! Ndërsa, koha i kërkon ata që dinë dhe kanë integritet në qëndrime e vendimet që koha i kërkon të merren. A koha e jonë i kërkon njerëzit e virtytshëm e me integritet të lartë!
E gjithë historia e jonë e lavdishme na tregon se: Integritetin njerëzit e virtytshëm e tregojnë në kohë të vështira!
Si përfundim: Në vitin 2010, Raportin e Dick Martin e kam quajtur -Raport racist. Çdo shqiptar që D. Martin e quan PATRIOT, qoftë në shërbim të Kryeministrit apo kudo tjetër, është kolaboracionist e në shërbim të politikave gjenocidiste të Millosheviqit!
Unë pres që organet drejtuese të LVV-së, kuptohet nëse Ato janë funksionale, të distancohen seriozisht nga “patriotizmi i Dick Martit”!Nëse ato nuk distancohet, atëherë ato janë politika të VV-së.
