Kryetari i Komunës së Prizrenit, Mytaher Haskuka dhe drejtoresha e Drejtorisë Komunale të Arsimit gjatë së enjtes së bashku me me udhëheqësit e Policisë në Prizren dhe drejtorin e Policisë për Komunitet kanë mbajtuar një mbledhje për të diskutuar në lidhje me sigurinë në shkollat në këtë komunë, përcjell InLajmi.
Drejtuesit e Komunës së Prizrenit së bashku me policinë u zotuan se se do të rrisin numrin e patrullave të policisë afër shkollave në Prizren pasi që kjo do të rriste sigurinë.
Haskuka tha se për të analizuar situatën janë intervistuar një numër i madhë i nxënësve, mësimdhënësve dhe prindërve.
Kryetari Haskuka tregoi se Policia e Kosovës, DKA-ja dhe të gjithë drejtorët e shkollave, do të rrisin bashkëpunimin në mes vete, për të organizuar sa më shumë trajnime për nxënës në mënyrë që ta parandalojmë dhunën dhe ngacmimet tek të rinjtë.
Postimi i plotë i tij:
Kryetari i Komunës së Prizrenit, Mytaher Haskuka dhe drejtoresha e Drejtorisë Komunale të Arsimit, Xhemile Thaçi Vezgishi, sot së bashku me udhëheqësit e Policisë në Prizren, Qamil Kroni, Musli Kulolli, dhe drejtorin e Policisë për Komunitet, Vesel Gashi, kanë mbajtur një mbledhje me drejtorët e shkollave për të diskutuar rreth ngritjes së sigurisë së shkollave të qytetit të Prizrenit
Në këtë takim ku të gjithë drejtorët e shkollave, i dhanë propozimet e tyre në lidhje këtë çështje, nga Policia e Kosovës premtuan se numri i patrullave policore në afërsi të shkollave do të rritet më shumë.
Me këtë rast, kryetari Haskuka deklaroi se DKA-ja, ka projekt për analizën e gjendjes në shkolla ku janë intervistuar më shumë se 2400 nxënës, një numër i konsiderueshëm i prindërve dhe mësimdhënësve. Sipas rezultateve, do të zhvillohen projekte për adresimin e problemeve nëpër shkolla. Ky projekt është duke u implementuar së bashku me pedagogët dhe psikologët e shkollave të Prizrenit.
Po ashtu, kryetari Haskuka, theksoi se Policia e Kosovës, DKA-ja dhe të gjithë drejtorët e shkollave, do të rrisin bashkëpunimin në mes vete, për të organizuar sa më shumë trajnime për nxënës në mënyrë që ta parandalojmë dhunën dhe ngacmimet tek të rinjtë./InLajmi/
