Përfaqësuesi i Lidhjes Demokratike të Kosovës në Komisionin Qendror të Zgjedhjeve, Florian Dushi, e ka kritikuar ushtruesen e detyrës së presidentes, Vjosa Osmanin, e cila përmes një letre kërkoi nga KQZ që ta shqyrtojë vendimin për votuesit jashtë vendit, përcjell InLajmi.
Dushi ka thënë se Osmani ka ndërhyrë në pavarësinë e KQZ-së me reagimin dhe kërkesën e saj për shqyrtim të vendimit.
Postimi i plotë i tij:
“Tentim i paprecedentë për të ndërhyrë dhe diktuar punën e një institucioni të pavarur kushtetues, Komisionit Qendror të Zgjedhjeve.
Nëse vendimi i KQZ-së është në kundërshtim me Kushtetutën apo ligjet përkatëse, janë organet kompetente, Paneli Zgjedhor për Ankesa dhe Parashtresa, Gjykata Supreme, e më tutje Gjykata Kushtetuese, ato që mund të kontrollojnë ligjshmërinë, apo edhe kushtetutshmërinë e vendimit të KQZ-së, përfundimisht duke e ndryshuar apo edhe anuluar një akt të tillë.
Ky vendim, nuk është çështje e organeve të tjera, aq më pak e atyre organeve bartës të përkohshëm të të cilave janë (sipas paralajmërimeve) edhe kandidat në zgjedhjet e ardhshme, rregullat e të cilave po provojnë t’i diktojnë!”./InLajmi/
