Policia e Kosovës gjatë ditës së sotme ka arrestuar disa aktivistë të PSD-së , të cilët kanë zhvilluar një protestë simbolike lidhur me gjobat e shqiptuara ndaj qytetarëve në vlerë prej 3 milion euro, përcjell InLajmi.
Pas arrestimit të aktivistëve të kësaj partie, kanë reaguar nga PSD, duke thënë se ligji në këtë rast shkon në dobi të fortit, dhe në dëmtim të dobëtit.
Postimi i plotë i PSD-së
Gjatë aksionit të sotëm simbolik për të shpërfaqur hipokrizinë e institucioneve të Kosovës karshi qytetarëve të saj, të cilët shqiptuan gjoba në vlerë prej 3 milion eurosh për qytetarët e gati asnjë për tubimet e partive politike, aparati policor shtetëror ndërhyri dhunshëm për ta ndërperë aksionin duke arrestuar aktivistët e PSD-së.
Kur zbatimi i ligjit është selektiv, ai gjithmonë shkon në dobi të të fortit e në kurriz të të dobëtit. Ligji është nxjerrë nga politikanët, të cilët janë të parët dhe pothuajse të vetmit që nuk po e zbatojnë dhe për këtë nuk ndëshkohen.
Kërkojmë urgjentisht që aktivistet dhe aktivistët Dardan Molliqaj, Teutë Rrusta, Zgjim Hyseni, Nol Nushi, Leonard Shala, Gëzon Kastrati, Qëndrim Sahiti, Arbër Sejdiu, Drin Ahmeti, Gent Brahimi, Agron Kabashi, Veton Dragusha, Fatos Sahiti, Trim Gashi, Natyra Kuçi dhe Frashër Krasniqi të lirohen menjëherë nga arrestimi i padrejtë që iu është bërë nga policia./InLajmi/.
