Janë bërë 10 muaj që Kosova është duke u përballur me pandeminë COVID-19.
Që nga 13 marsi 2020 kur u paraqit rasti i parë e deri më tani, në vend janë shënuar 53.523 raste me koronavirus nga 195.475 persona sa janë testuar si të dyshimtë.
Përveç numrit të lartë të rasteve, deri më sot në Kosovë janë shënuar edhe një numër i madh i rasteve të vdekjes nga ky virus.
Deri më sot nga virusi SARS-CoV-2 kanë humbur jetën 1.375 persona.
Megjithatë edhe numri i personave që po arrijnë të shërohen nga ky virus është i lartë. Brenda këtyre dhjetë muajve, numri i personave të shëruar ka arritur në 45.613, kurse raste aktive mbeten 6 mijë e 535.
Të shtunën në vend u konfirmuan 259 raste të reja, dhe shtatë raste të vdekjes. Komuna me më së shumti raste pozitive në vend vazhdon të mbetet Prishtina.
Për parandalimin e përhapjes së koronavirusit, Qeveria e Kosovës që nga fillimi i pandemisë ka marrë një sërë masash.
Aktualisht në fuqi janë masat të cilat kufizojnë lëvizjen e qytetarëve dhe punën e lokaleve të gastronomisë, varësisht zonës që gjenden qytetet, sipas numrit të të infektuarve gjatë një jave.
Prishtina, Fushë-Kosova, Obiliqi, Mitrovica e Veriut, Zveçani, Zubin Potoku dhe Leposaviqi, janë në zonën e kuqe, apo të rrezikut të lartë të përhapjes së virusit.
Në zonën e verdhë, atë të rrezikut mesatar për përhapje të virusit, janë Mitrovica e Jugut, Ferizaj, Lipjani, Podujeva. Vushtrria, Parteshi dhe Juniku, transmeton Telegrafi.
Në zonën e gjelbër, apo të rrezikut të ulët të përhapjes së virusit, janë Gjakova, Kllokoti, Kamenica, Peja, Drenasi, Skenderaj, Istogu, Deçani, Shtëprca, Klina, Shtimja, Novobërda, Vitia, Prizreni, Suhareka, Kaçaniku, Rahoveci, Malisheva, Hani i Elezit, Dragashi, Mamusha, Gjilani, Ranillugu dhe Graçanica.
