Mesditën e së dielës, pompa e derivateve “V-Petrol” në Prishtinë, ka bllokuar parkingun e “Albi Mall”, nën pretendimet se një pjesë e parkingut të cilën e shfrytëzon qendra tregtare, është në pronësi të tij. Por, këto pretendime po i hedh poshtë drejtori i “Albi Commerce”.
Policia e Kosovës dhe Inspeksioni është dashur të ndërhyjnë të dielën te një pjesë e parkingut të “Albi Mall”, në Prishtinë.
Krejt kjo, pasi pronari i pompës së derivateve pretendonte se qendra tregtare po e përdor parkingun i cili është në pronësi të tij.
Por, pretendimet e tij po i hedh poshtë drejtori i “Albi Commerce”, Sutki Humolli.
Përmes një prononcimi për media, ai ka deklaruar se pronari i “V-Petrol” po flet të pavërteta.
“Nga data 01 janar 2021 e deri më datën 3 janar 2021 përmes mediumeve janë plasuar informacione të pa sakta duke etiketuar kompaninë Albi Commerce shpk si uzurpatore të parkingut të “Valoni Petrol” shpk. Të shtyrë nga nevoja për qartësim ndaj opinionit publik, theksojmë se qiradhënësi Valoni Petol shpk përmes përfaqësuesit të saj ka plasuar të pa vërteta në opinion dhe/ose ka shtrembëruar të vërtetën duke fshehur faktet vendimtare të një mosmarrëveshje të cilën e ka iniciuar vet ai e që kjo buron nga kontrata noteriale e qirasë dhe se pretendimi për qiranë e pa paguar nuk qëndron meqë Albi Commerce shpk nuk i detyrohet qiradhënësit asnjë pagesë të mbetur”, ka deklaruar Humolli.
Ai tutje thotë se kompania e tij ka kontratë 7-vjeçare në atë hapësirë ku është qiramarrëse.
Humolli shton se qiradhënësi ka shkelur kontratën dhe ka ndërhyrë dhunshëm në pronën të cilën e ka dhënë me qira.
“Kompania jonë ka një kontratë 7 vjeçare të qirasë ku ne jemi qiramarrës. Kjo kontratë është kontratë noterile dhe ka numër LRP nr. 7298/2017 me numër reference 1059/2017. Në kundërshtim me afatet e kësaj kontrate noteriale, qiradhënësi ka njoftuar për shkëputjen e saj me efekt nga data 01 janar 2021 dhe dhunshëm ka ndërhyrë në pronën të cilën e ka dhënë me qira duke shkelur afatet ligjore të kontratës. Para kësaj date kemi pasur shkëmbimin me shkrim të njoftimeve dhe përgjigjeve në njoftimet e qiradhënësit të cilit i kemi bërë të qartë se veprimi i tij është i kundërligjshëm”, ka deklaruar Humolli.
Ai ka deklaruar se kompania e tij do të kërkojë mbrojtjen ligjore në të gjitha instancat dhe për të gjitha aspektet ligjore që lidhen me këtë rast.
“Andaj, e vërteta është se Albi Commerce shpk (ose Albi Mall siç theksohet në publik) nuk është uzurpator, ka kontratë noteriale të nënshkruar për qira ku afatet janë të përcaktuara qartësisht e të njëjtat arbitrarisht nuk janë respektuar nga qiradhënësi për çka i jemi drejtuar institucioneve. Qiradhënësi ka ndërhyrë dhunshëm në hapësirën e dhënë me qira duke shkel kontratën dhe dhunshëm ka vepruar duke vendosur pengesa në atë hapësirë të dhënë me qira ku një pjesë e hapësirës publike rezulton se është uzurpuar nga qiradhënësi dhe se edhe mbi këtë pjesë i njëjti ka vendosur pengesa të forta pa pasur asnjë autorizim nga institucionet publike. Ne do të vazhdojmë të kërkojmë mbrojtjen ligjore në gjitha instancat dhe për të gjitha aspektet ligjore që ndërlidhen me rastin në fjalë”, ka thënë Humolli.
Ndërkohë, për këtë rast është deklaruar edhe Policia e Kosovës në raportin 24 orësh.
Policia ka bërë të ditur se rasti është iniciuar si “Vetëgjyqësi”, raporton Gazeta Express.
“VETËGJYQËSI-Veternik, Prishtinë 03.01.2021 – 11:15.I dyshuari mashkull kosovar pasi që ka pasur një kontest rreth një hapësire ku është shfrytëzuar për parking të veturave të konsumatorëve kishte vendosur barriera të metalit dhe betonit, me urdhër të prokurorit kujdestar, barrierat janë larguar dhe në vendin e ngjarjes kanë dal edhe inspektorët komunal për veprime të mëtejme”, thuhet në raportin e Policisë.
