Gjermania dhe Danimarka po shqyrtojnë mundësinë e shtyrjes së dhënies së dozës së 2-të të vaksinës kundër Covid-19 të kompanive BioNTech dhe Pfizer për të përmirësuar furnizimin me vaksina.
Një lëvizje të ngjashme e bëri edhe Britania e Madhe, javën e kaluar.
Në Berlin, Ministria e Shëndetësisë po kërkon pikëpamjen e një komisioni të pavarur nëse do të vonojë dhënien e dozës së dytë, përtej një maksimumi prej 42-ditësh të parashikuar, sipas një dokumenti të parë nga Reuters të hënën.
Dokumenti pason kritikat gjatë fundjavës të Ministrit të Shëndetësisë, Jens Spahn – përfshirë edhe aleatët e tij politikë konservatorë – se Gjermania nuk ka arritur të sigurojë mjaft vaksina dhe ka qenë shumë e ngadaltë në fushatën e saj të vaksinimit, raporton Berlin Today.
Masa e Britanisë së Madhe për të vonuar administrimin e një doze të 2-të është mirëpritur nga një numër i ekspertëve gjermanë të shëndetit dhe vjen ndërsa qeveritë përpiqen të sigurojnë mbrojtje ndaj koronavirusit për sa më shumë njerëz duke u dhënë atyre një dozë, sa më shpejt të jetë e mundur, dhe duke vonuar të 2-tën, transmeton arbresh.info.
“Për shkak të mungesës aktuale të vaksinave dhe numrit shumë të lartë të të infektuarve dhe shtrimeve në spital (në Gjermani), është më efektive një strategji, përmes së cilës sa më shumë njerëz vaksinohen sa më shpejt të jetë e mundur”, tha Leif-Erik Sander, kreu i ekipit kërkimor të vaksinave në spitalin Charite të Berlinit.
