Ish-Ministrja për Dialog, Edita Tahiri ka thënë se nuk do të garojë në zgjedhjet e reja që pritet të mbahen së shpejti.
Tahiri nuk ka treguar nëse ka marrë ftesë nga ndonjëra prej partive politike.
“Në zgjedhje nuk e kam ndërmend të marr pjesë, sepse është kohë pandemie. Natyrisht që ka shumë që marrin pjesë, por konsideroj se Kosovës i kam dhënë maksimumin nga mendja, shpirti, ana fizike dhe emocionale. Në këtë kohë pandemie nuk ma merr mendja se do të marr pjesë, sepse fushata duhet bërë në mënyrë të drejtpërdrejtë sepse jo çdo gjë mund të bëhet në mënyrë virtuale”, raporton Klan Kosova.
“Kërkoj mirëkuptimin e simpatizantëve dhe përkrahësve që numër një e kam shëndetin në këtë periudhë. Në kohërat e okupimit kam qenë e gatshme që të vdes për Kosovën. Çdo ditë ka qenë rrezik që të vritem, por ajo ka qenë lufta jonë për liri dhe kam qenë e gatshme. Tani po kujdesem për shëndetin tim dhe nuk besoj që do të marr pjesë”.
