Kandidati për kryeministër nga PDK, Enver Hoxhaj, ka njoftuar për një iniciativë të re brenda partisë së tij, përcjell InLajmi.
Përmes një postimi në Facebook, Hoxhaj tha se si Partia që gjithmonë u ka prirë proceseve, pas listave të pastërta të kandidatëve pa aktakuza, tani për ofertën e tyre politike do t’i drejtohen bazës së partisë, degëve dhe nëndegëve e deri te anëtarët e thjeshtë për të vendosur për kandidaturat e PDK-së në listën për deputetë edhe për ofertën programore.
Ai gjithashtu ka shkruar se vendimmarrja do të vijë nga poshtë lartë dhe zëri i çdo anëtari do të dëgjohet.
Postimi i tij i plotë:
“Mikëpritje e madhe dhe entuziazëm sonte në Shtime, në takim me Degën dhe strukturat tona, ku e zyrtarizuam edhe një iniciativë për avancimin e demokracisë dhe shpërndarjen e vendimmarrjes. Si Partia që gjithmonë u kemi prirë proceseve, pas listave të pastërta të kandidatëve pa aktakuza, tani për ofertën tonë politike do t’i drejtohemi bazës së partisë, degëve dhe nëndegëve e deri te anëtarët e thjeshtë për të vendosur për kandidaturat e PDK-së në listën për deputetë edhe për ofertën programore. Kështu, vendimmarrja do të vije nga poshtë lartë dhe zëri i çdo anëtari do të dëgjohet. Edhe ky vendim i yni do t’i shërbejë fuqizimit të mëtutjeshëm të partisë dhe Kosovës do t’i jap qeverisjen që meriton”./InLajmi/
