Kryetari në detyrë i Partisë Demokratike të Kosovës, si dhe mandatari i kësaj partie për kryeministër të vendit, Enver Hoxhaj, ka thirrur sot një konferencë për media në të cilën u deklarua për diasporën, përcjell InLajmi.
Hoxhaj tha se e bashkëndjen mundimin dhe rrugën e gjatë të tyre si dhe pritjet e gjata nëpër pikat kufitare.
Ai tha se si PDK mendojnë që në të ardhmen shteti duhet t’ua lehtësojë ardhjen atyre në Kosovë.
“Diaspora është një infuzion i fuqishëm për ekonominë e Kosovës dhe mbështetje e madhe për Kosovën në kohë të vështira, e sjellin gazmendin në kohë të vështira dhe sa më e gjerë të jetë diaspora në gjeografi globale aq më afër e ndjejnë veten ndaj shtetit të tyre.Ne si PDK e kemi të pashmangshëm fatin tonë të lidhur me diasporë, meqë të dy liderët tanë Veseli dhe Thaci kanë jetuar dhe vepruar në diasporë”, tha ai.
Hoxhaj theksoi se nga aty kanë filluar edhe rrugën e çlirimit dhe se s’ka parti politike, e cila është më tepër e lidhur me diasporën sesa PDK./InLajmi/