Aleanca për Ardhmërinë e Kosovës do të marrë pjesë në takimin e sotëm të ftuar nga ushtruesja në detyrë e presidentes, Vjosa Osmani rreth mbajtjes së zgjedhjeve të parakohshme. Këtë e ka konfirmuar deputeti i AAK-së, Rasim Selmanaj.
“Po do të marrim pjesë, AAK do ta dërgon një përfaqësues”, ka thënë Selmanaj.
Ndërsa, i pyetur rreth vendimit të Kushtetueses për Qeverinë Hoti, Selmanaj ka deklaruar se do të respektojnë çdo vendim të saj.
“Ne si parti politike asnjëherë vendimet e Gjykatës Kushtetuese nuk I kemi kundërshtuar dhe do t’i respektojmë çfarëdo qofshin ato”.
Ushtruesja në detyrë, Vjosa Osmani gjatë ditës së sotme do t’i takojë liderët e partive politike për t’u konsultuar rreth mbajtjes së zgjedhjeve të parakohshme, ka thënë Selmanaj.
Takim ky që vie pas vendimit të mbrëmshëm të Kushtetues se Qeveria Hoti është zgjedhur në mënyrë jo legjitime.
Presidentja në detyrë, fillimisht do ta takojë liderin e Lëvizjes Vetëvendosje, Albin Kurti. Takimi mes Osmanit e Kurtit pritet të mbahet në ora 13:00. Po ashtu të njëjtat burime bëjnë me dije se në ora 14:00 Osmani do ta takojë ish-shefin e saj, kryetarin e LDK-së, Isa Mustafa.
Ndërkohë në ora 15:00 në zyrë të presidentes në detyrë do të shkojë ushtruesi i detyrës së kryetarit të PDK-së, Enver Hoxhaj.
Ndërkaq, në ora 16:00 Osmani do ta takojë kryetarin e AAK-së, Ramush Haradinaj, raporton Front Online.
Gjykata Kushtetuese mbrëmë ka vendosur pro kërkesës së Lëvizjes Vetëvendosje rreth vlefshmërisë së votës së deputetit Ethem Arifi për zgjedhjen e Qeverisë Hoti, me çka edhe zyrtarisht vendi do të shkojë drejt zgjedhjeve të reja të parakohshme.
