Ky vendim i Belgjikës vjen pas deklaratës për shfaqjen e një lloji të ri më infektues të koronavirusit në Britani
Kryeministri i Belgjikës, Alexander De Croo tha se do të pezullojnë të paktën për 24 orë transportin ajror dhe hekurudhor me Britaninë e Madhe pas deklaratës për shfaqjen e një lloji të ri më infektues të koronavirusit (COVID-19).
Në deklaratën në një program televiziv, De Croo tha se duke filluar që nga mesnata do të mbyllen përkohësisht kufijtë për personat që vijnë me avion ose me tren nga Britania në Belgjikë.
“Ky vendim është marrë me qëllim për të zhvilluar hulumtime shkencore rreth një virusi të ri i cili vërehet në jug të Britanisë dhe që është më infektues”, theksoi De Croo, i cili shtoi se afati 24 orësh mund zgjatet.
Ai tha se ka shumë pyetje pa përgjigje lidhur me çështjen nëse ka arritur apo jo në territorin evropian mutacioni ose lloji i ri i virusit.
Holanda pezulloi fluturimet me Britaninë
Qeveria e Holandës që nga mesnata mbrëmë ka pezulluar fluturimet me Britaninë e Madhe deri më 1 janar 2021, transmeton Anadolu Agency (AA).
Organizata Botërore e Shëndetësisë (OBSH) njoftoi se janë në “kontakt të ngushtë” me zyrtarët britanikë lidhur me mutacionin për të cilin thuhet se koronavirusi i ri (COVID-19) përhapet më shpejt.
