Kryeministri i Kosovës, Avdullah Hoti është takuar me përfaqësuesit e odave ekonomike të Kosovës, me ç’rast kanë diskutuar rreth ligjit për rimëkëmbje, raporton InLajmi.
Ai ka thënë se ndër tjerash janë dakorduar edhe për një ridizajnim të masave anti-Covid.
“U dakorduam për ridizajnim të masave kundër COVID-19. Pika kryesore ka të bëjë me masat anti-Covid. U dakorduam të punojmë bashkë për pakon e re të rimëkëmbjes ekonomike dhe të finalizojmë masat për një pako të tretë fiskale që të bëhet në janar. Pika kryesore e diskutimit ka të bëjë me masat anticovid”, tha Hoti.
Ai potencoi se pas pak do t’i takojë profesionistët shëndetësorë për t’i rishikuar masat në detaje që duhet t’i ndërmarrin krahas gjendjes së re.
“Situata nuk pritet të përmirësohet sa i përket pandemisë dhe duhet të jemi gati me të gjithë skenarët, por brenga kryesore është që brenda një afati të shkurtër të rishikohet orari i kufizimit”, theksoi Hoti.
I pyetur se kur do të hynë në fuqi masat e reja, Hoti ka thënë se janë duke diskutuar dhe se deri të premten do të finalizohen./InLajmi/
